Ambasadorja gjermane: Zgjedhjet s’e zgjidhin krizën

Ambasadorja e Gjermanisë në Kosovë, Angelika Viets ka thënë se zgjedhjet e parakohshme në Kosovë nuk do të zgjidhnin krizën politike.

“Fatkeqësisht, viti i ri në Kosovë nisi siç përfundoi edhe i kaluari: ende nuk ka dialog demokratik për çështjet kontestuese ndërmjet qeverisë dhe opozitës. Bllokada po vazhdon me gjasë me qëllimin e vetëm – zgjedhje të reja parlamentare – të tretat që do të mbaheshin para kohe që prej shpalljes së pavarësisë”, ka thënë Viets në një deklaratë për medie.

“Sipas sondazheve, Parlamenti i ri nuk do të dallonte shumë nga ky aktual. Mbajtja e zgjedhjeve të reja do t’i humbiste Kosovës kohë të çmueshme në përpjekjet për të përmirësuar jetën e qytetarëve, sidomos sa i përket investimeve dhe krijimit të vendeve të reja të punës”, ka shtuar ajo.

Ajo i ka bërë thirrje partive politike që krizën ta zgjidhin në institucione.