Ambasadori Malaj dënon ndalimin për kosovarët në klubin e Cyrihut

Ambasadori i Republikës së Kosovës në Bernë, Naim Malaj në një letër dërguar institucioneve përgjegjëse ka dënuar në mënyrën më të ashpër ndalesën që një klub i Cyrihut me pronarë serbë u bën në mënyrë eksplicite kosovarëve dhe shqiptarëve në përgjithësi.

“Po ju drejtohem me ketë shkresë për të paraqitur shqetësimin tim për një sjellje të papranueshme dhe diskriminuese të udhëheqësve të një Klubi të Natës në Kantonin e Zurichut, “Jil”, kundër komunitetit shqiptar dhe kosovar.

Para pak kohësh, një kosovari i është ndaluar hyrja për arsye të përkatësisë kombëtare të tij. Nëpër mediume zvicerane është përhapur lajmi që në këtë klub, hyrja është e ndaluar “për të miturit, por edhe për shqiptaret dhe kosovaret”. Klubi Jil zbaton këtë politikë në mënyrë shumë të hapur, transmeton albinfo.ch.

Përballë kësaj sjelljeje të dënueshme dhe qëndrimi racist, Ambasada e Kosovës shpreh shqetësimin e thellë duke i bërë thirrje autoriteteve zvicerane për vigjilencë të lartë dhe marrjen e masave të nevojshme për ta dënuar këtë sjellje të palejueshme.

Ambasada e Kosovës dënon me vendosmërinë më të lartë këtë sjellje raciste, e cila nuk do duhej të tolerohej por as të ekzistonte në Zvicër, thuhet në letrën e nënshkruar nga ambasadori i Republikës së Kosovës në Bernë, Naim Malaj.

Në fund ambasadori bën të ditur se po kjo letër i është dërguar Zyrës së Prokurorit ne Zurich, Komisionit Federal kundër racizmit dhe Lidhjes Ndërkombëtare kundër Racizmit dhe Antisemitizmit.