Ambasadorët bojkotuan seancën e VLAN-it

Ambasadorët e huaj të akredituar në Prishtinë, edhe pse të ftuar, nuk kanë marrë pjesë në seancën që zhvillua të enjten paradite në sallën e Kuvendit të Kosovës, të thirrur me nënshkrime të 62 deputetëve të koalicionit paszgjedhor LDK-VV-AAK-Nisma (LVAN).

Kryesimi i seancës nga deputetja e re, Teuta Rugova dhe debati (fjalimet) e deputetëve të koalicionit LVAN nuk janë dëgjuar “live” nga ambasadorët, të cilët për një apo tjetër arsye kishin vendosur të mos shkojnë sot në sallën e Kuvendit.

“Ne i kemi dërguar ftesat në adresë të ambasadave dhe nuk e dimë arsyen pse përfaqësuesit diplomatikë kanë vendosur të mos vijnë”, ka thënë me kusht anonimiteti për lajmi.net, një nga deputetët e LDK-së, parti kjo udhëheqëse e koalicionin LVAN.

I pyetur nëse edhe diplomatët e kanë vlerësuar këtë seancë si “takim joligjor”, ashtu sikurse është shprehur orë më parë kryeministri në largim, Hashim Thaçi, njëherësh kryetar i PDK-së, deputeti i LDK-së ka thënë se nuk dëshiron të paragjykojë se si e kanë gjykuar ndërkombëtarët seancën e sotme, për kryeministrit siç ka thënë ai, deputetët e LVAN-it ia kanë dhënë përgjigjen në Kuvend.

Ndërkohë Sekretaria e Kuvendit ka demantuar shkrimet në disa portale se nuk janë lejuar përfaqësuesit e huaj që të futen në sallë, duke thënë se nuk është i vërtetë lajmi se përfaqësuesja e UNMIK-ut është penguar të përcjell punimet e kësaj seance nga salla e Kuvendit.

“Punonjësit e Drejtorisë për protokoll i kanë përcjellë me mirësjellje mysafirët që kanë shfaqur interes për ta ndjekur nga afër takimin e sotëm të deputetëve… Edhe zyrtarja e UNMIK-ut, e cila gjoja është penguar të hyjë në Kuvend, e ka ndjekur pa asnjë pengesë gjithë takimin e sotëm të deputetëve”, ka njoftuar Sekretaria e Kuvendit.

Por përveç përfaqësues së UNMIK-ut, mision ky të cilit edhe zyrtarisht i është bërë e ditur prej kohësh se është i padobishëm në Kosovë, diplomatët tjerë duket se presin ftesë nga kryesuesja legjitime e Kuvendit, deputetja më e vjetër Flora Brovina.

Që nga 8 qershori, kur janë mbajtur zgjedhjet parlamentare, ka pasur dy përpjekje të dështuara për zgjedhjen e kryetarit të Kuvendit dhe nënkryetarëve të tij, ndërsa faktori ndërkombëtar nuk ka pranuar të përzihet, duke kërkuar që ngërçi politik të zgjidhet nga vet partitë parlamentare të Kosovës.

Në seancën e parë, Gjykata Kushtetuese me kërkesë të PDK-së, solli aktgjykimin sipas të cilit ishin shkelur procedurat, rregullorja e Kuvendit dhe Kushtetuta, dhe si rrjedhojë u anulua zgjedhja e kryeparlamentarit (Isa Mustafa).

Vazhdimi i dytë i seancës konstituive, pas gati dy muajsh, u mbyll pas katër minutash, pasi Arsim Bajrami nuk mori votat e nevojshme për të qenë kryetar i Kuvendit, gjë që sipas aktgjykimit të Kushtetueses, kjo pozitë i takon partisë fituese, Partisë Demokratike. /Lajmi/Telegrafi/