Aliu: Jemi të interesuar të hartojmë një buxhet në interes të gjithë qytetarëve pa dallime

Viti – Në organizimin e misionit të OSBE-së në Viti është mbajtur një punëtori rreh buxhetimit të përgjegjshëm gjinor në nivel lokal. Në këtë punëtori kanë marrë pjesë Grupi i Grave të Vitisë, përfaqësues të drejtorive të Arsimit, Shëndetësisë, Ekonomisë por edhe përfaqësues të shoqërisë civile.

Zv. Kryetari i Komunës së Vitisë, Hasan Aliu duke folur rreth hartimit ë buxhetit nga Institucionet Komunale të Vitisë tha se ata janë të përkushtuar që të hartojnë një buxhet i cili është në interes të gjithë qytetarëve të kësaj komune pa dallime etnike, gjinore, moshës etj.”Dua të ju siguroj se Qeveria Komunale e Vitisë është e përkushtuar që të gjitha proceset t`i çojmë përpara. Në këtë kontekst hynë edhe procesi i hartimit të buxhetit e ku vitin e shkuar kemi mbajtur 15 diskutime publike, nga to një e kemi mbajtur me personat me nevoja të veçanta, një me gjininë femërore, por edhe një me komunitetin pakicë serb ndërsa të tjerat janë mbajtur nëpër lokalitetet e ndryshme të Komunës sonë dhe kjo është bërë me qëllimin më të mirë që të hartohet një buxhet që është në interesin e të gjithëve pa dallime” u shpreh Aliu.

Ndërkaq Ulrich Biffar, Drejtor i OSBE-së për Regjionin e Gjilanit tha se komuna e Vitisë është ndër komunat më të mira sa i për këtë çështjeve që kanë të bëjnë me gjininë konkretisht me gjininë femërore ku sipas tij një meritë të veçantë për këtë e ka zyrtarja në këtë komunë, Ibadete Hyseni.

Ndërkaq gjatë kësaj punëtorie rreth rëndësisë që ka buxhetimi i përgjegjshëm gjinor në nivel lokal ka ligjëruar Drillona Emerlllahu, eksperte në këtë fushë e angazhuar nga misioni i OSBE-së.

Përndryshe në këtë takim kanë marrë pjesë Grupi i Grave të Vitisë, përfaqësues të drejtorive të Arsimit, Shëndetësisë, Ekonomisë, por edhe përfaqësues të shoqërisë civile./rajonipress/