Gjilan – Kryetari i Komunës së Gjilanit, Alban Hyseni së bashku me kryesuesin e Kuvendit Komunale, Arianit Sadiku dhe bashkëpunëtorët, ka pritur sot në takim ministrin e Mjedisit, Planifikimit Hapësinor dhe Infrastrukturës, Liburn Aliu.
Hyseni, pasi e ka falënderuar për vizitën, e ka njoftuar ministrin për problematikat, sfidat dhe projektet që janë planifikuar.
“I prezantuam në detaje të gjitha synimet tona për katër vitet e ardhshme, pra kryesisht projektet që kanë implikim më të madh buxhetor, por edhe në kuptimin e zhvillimit dhe ndryshimit të qytetit. Unë kam kërkuar, po ashtu, ndihmë dhe bashkëpunim dhe besoj që sikurse çdo komunë që e gëzon mbështetjen e qeverisë, edhe Gjilani nuk do të përjashtohet nga kjo. Në të ardhmen do të mund të raportojmë edhe për projekte konkrete”, ka thënë Hyseni.
Ndërsa, ministri Aliu e ka falënderuar kryetarin Hyseni për pritjen, derisa tha se ka parë projekte interesante që lidhen me turizmin, zhvillimet rurale e mjedisin në përgjithësi, duke shtuar se qytetarët e Gjilanit do të kenë mundësi të kenë qasje më të madhe në natyrë, duke krijuar mundësi zhvillimi të qëndrueshëm nëpër zonat rurale e që lidhet edhe me trashëgiminë kulturore si Kalaja e Pogragjës dhe projektet e mundshme ndërkufitare.
“Në takim me kryetarin pata kënaqësi që të shoh shumë projekte interesante që do të realizohen, disa prej tyre që janë vazhdimësi nga e kaluara dhe të tjera që planifikohen të fillojnë. Po ashtu, diskutuam edhe për impiantin për trajtimin e ujërave të zeza për mënyrën se si do të funksionojë ai dhe atë për trajtimin e mbeturinave, e që janë projekte jashtëzakonisht të rëndësishme për mjedisin, sikurse edhe projektet tjera infrastrukturore që kanë të bëjnë me ujërat e trajtimin e shtretërve të lumenjve”, ka deklaruar pas takimit ministri i Mjedisit, Planifikimit Hapësonor dhe Infrastrukturës, Liburn Aliu.
Aliu ka konfirmuar se do t’i qëndrojë afër Gjilanit për t’i zgjidhur problemet dhe për t’i realizuar projektet.
“Si Ministri, jemi të gatshëm që të punojmë nga afër, të shohim mundësitë që të ndihmojë dhe të bashkëveprojë me Komunën e Gjilanit në këto fusha. Folëm edhe për problem që i ka komuna me borxhet e mëdha që po i rriten dita-ditës, për projektet të cilat duhet të shikohet zgjidhje se si duhet të realizohen. Ministria jonë, por edhe ministritë tjera do të qëndrojnë afër Komunës së Gjilanit për t’i zgjidhur problemet që nuk janë të vogla, mbase më të mëdha që Gjilani me shpronësime”, ka shtuar ministri Aliu.
Më pas, Hyseni dhe ministri Aliu kanë vizituar punimet në disa projekte të cilat janë duke u realizuar./rajonipress/
