Albumi i Dua Lipës është i pari nga një femër në këtë dekadë, që kaloi mbi gjashtë muaj qëndrimi në top 10 të albumeve më të dëgjuara

Sukseset e këngëtares shqiptare me famë botërore, Dua Lipa, nuk kanë të ndalur.

Albumi i saj “Future Nostalgia” ishte albumi më i dëgjuar në kategorinë e femrave vitin e kaluar në Spotify.

Ndërkohë edhe sivjet duket se ky album po vazhdon të shënojë suksese e të arrijë rekorde.

Kopertina e albumit “Future Nostalgia” nga Dua Lipa (Foto: Dua Lipa/Instagram)

Së fundmi, “Future Nostalgia” është bërë albumi i parë i një artisteje femër që për gjashtë muaj me radhë qëndron pjesë e klasifikimit në top listën e njohur botërore, Billboard 200, në top 10 më të mirat.

Ka qenë nikoqiri i njohur i radios, Mike Adam, ai i cili përmes një statusi në rrjetin social Twitter, ka vënë në pah këtë sukses.

’Future Nostalgia’ nga Dua Lipa është albumi i parë nga një artiste femër që kaloi gjashtë muaj në top 10-shen e më të mirave në ‘Billboard 200’ këtë dekadë. Urime Dua Lipa”, shkroi Adam në statusin e tij.

“Future Nostalgia” është albumi i dytë në karrierën e Duas, gjersa një sukses të ngjashëm kishte shënuar edhe albumi i saj i parë me titull “Dua Lipa” i vitit 2017. /Telegrafi/

Shpërndaje.
© RAJONIPRESS