Albin Berisha nënshkruan me klubin rumun, zbulohen detajet e transferimit

Edhe Albin Berisha do të vazhdojë karrierën në Rumani. Ai ka nënshkruar kontratë me Petrolul Ploiesti, që bën gara në elitën e futbollit të atjeshëm.

Mediat rumune kanë raportuar këtë të shtunë se kjo lëvizje është kompletuar tashmë dhe se zyrtarizimi do të bëhet të hënën, shkruan Gazeta Express.

Sipas informacioneve të “AntenaSport“, përveç shumës së transferimit prej 200 mijë eurosh, FC Ballkani ka mbajtur një përqindje prej 20% të një transferimi të ardhshëm të Berishës.

Sulmuesi nga Kosova ka nënshkruar kontratë me Petrolul Ploiestin për 3 vite e gjysmë dhe testet mjekësore i ka kryer gjatë ditës së sotme.

23-vjeçari ka fituar 2 tituj kampioni dhe një trofe të Superkupës me Ballkanin.

Ai iu bashkua Ballkanit në vitin 2019 nga Besa, teksa luajti pastaj si i huazuar te Liria dhe Malisheva.

Albin Berisha gjithashtu ka bërë karrierë edhe në Shqipëri, te Kukësi dhe Laçi. /Gazeta Express/