Akuzojnë njëri tjetrin për keqpërdorime

Ish drejtori i shkollës “Mirali Sejdiu” në Goshincë të Vitisë, Xhevat Emërllahu, pas 39 viteve pune në arsim, thotë se është larguar nga puna. Ai ankohet se zyrtarët e Vitisë, nuk i krijuan një vend pune, ani se ishte drejtor shkolle dhe i kishin premtuar të mos e lënë pa punë.

“Më kanë thënë se do të më punësojnë diku tjetër. Por nuk i kanë mbajtur fjalët”, ka thënë ai. Më pas, Emërllahu thotë se ka konkurruar për drejtor në shkollën ‘Kuvendi i Lezhës’, por sipas tij kryetari i Komunës së Vitisë ka ndërhyrë për t’u anuluar konkursi.

“Tani e kanë punësuar si drejtor kundër kandidatin tim i cili ka pasur 50 pikë më pakë se unë”, ankohet për padrejtësi Emërllahu.

Më vonë, ai thotë se i kishin premtuar ta punësojnë si mësimdhënës. Por, asgjë deri më tani. Fehri Qerimi, drejtor i Drejtorisë së Arsimit, në komunën e Vitisë, thotë se nuk është e vërtetë që Xhevat Emerllahu është larguar nga puna. Por sipas tij, Emërllahut i ka kaluar mandati si drejtor i shkollës, kurse për të dytën herë, ai nuk është përzgjedhur si drejtor (Tribuna).