Aksioni në veri, Sveçla: Policia e Kosovës është duke zhvilluar hetime për rrjedhje të informatës zyrtare

Sot Policia e Kosovës në mbështetje të veprimtarisë së Doganës së Kosovës, ka zhvilluar një aksion në Komunën e Zubin Potokut me ç’rast janë kontrolluar tri lokacione në hapësira të dyshimta për aktivitete të jashtëligjshme të minimit të kriptovalutave.

Në lidhje me këtë, ministri i Punëve të Brendshme, Xhelal Sveçla ka thënë se ky aksion ka përfunduar pa incidente.

Sipas tij, Policia e Kosovës është duke zhvilluar hetime intensive për rrjedhje të informatës zyrtare.

“Në një nga lokacionet është vërejtur infrastruktura por mungonin paisjet për këtë veprimtari të jashtëligjshme. Duke marrë parasysh këtë fakt, Policia e Kosovës është duke zhvilluar hetime intensive për rrjedhje të informatës zyrtare”.

“Ftoj të gjithë qytetarët tanë që të bashkëpunojnë me Policinë e Kosovës duke lajmëruar çfarëdo veprimtarie joligjore, të kujtdo qoftë, duke kontribuar kështu drejtpërdrejtë në sundimin e ligjit për të gjithë dhe kudo në Kosovë”, ka shkruar Sveçla në një postim në Facebook. /Zëri

Shpërndaje.
© RAJONIPRESS