Aksion në Kamenicë: Arrestohen dy persona, konfiskohen armë, mijëra euro dhe dokumente të sistemit paralel serb

Kamenicë – Dy persona janë arrestuar në Kamenicë nën dyshimin për kryerjen e veprave penale “Mbajtje në pronësi, kontroll ose posedim të paautorizuar të armës” dhe “Asgjësim apo fshehje e materialit arkivor”, në një aksion të zhvilluar nga organet e rendit dhe hetuesisë.

Sipas njoftimit zyrtar të Policisë së Kosovës, gjatë bastisjeve të realizuara në shtëpitë e dy të dyshuarve meshkuj kosovarë janë gjetur dhe sekuestruar prova të shumta materiale, përfshirë një armë zjarri dhe një sasi të konsiderueshme parash në valuta të ndryshme.

Gjatë operacionit policor janë konfiskuar një pushkë, 19.440 euro, 91.500 dinarë serbë, 200 dollarë amerikanë dhe 1.300 franga zvicerane. Po ashtu, autoritetet kanë sekuestruar një vulë me stemën e shtetit të Serbisë, gjashtë laptopë, katër njësi kompjuterike, një telefon mobil si dhe dokumentacion të ndryshëm.

Në mesin e materialeve të sekuestruara janë gjetur edhe dosje që përmbajnë kontrata të punëtorëve të lidhura me sistemin paralel serb, si dhe dokumente të tjera që do t’i nënshtrohen analizës dhe verifikimeve të mëtejshme nga organet kompetente.

Pas intervistimit dhe me vendim të prokurorit të shtetit, të dyshuarit janë dërguar në mbajtje, ndërsa hetimet po vazhdojnë për zbardhjen e plotë të rrethanave të rastit dhe përcaktimin e rolit të secilit në aktivitetet e dyshuara.

Autoritetet nuk kanë bërë të ditur detaje shtesë lidhur me natyrën dhe përmbajtjen e plotë të dokumentacionit të sekuestruar, ndërsa rasti mbetet në procedurë hetimore./rajonipress/