AKR-ja e bëri këtë Qeveri dhe e shpëtoi pa rënë

Nënkryetari i Aleancës Kosova e Re (AKR), Fatmir Matoshi, ka thënë se kjo parti nuk ka qenë e kënaqur me kërkesën e kryeministrit Ramush Haradinaj për ta liruar Flamur Sefaj postin e ministrit të Punëve të Brendshme.

Në këtë intervistë dhënë për gazetën “Epoka e re”, ai ka thënë se kjo kërkesë ishte e padrejtë. Pavarësisht prej kësaj, Matoshi ka thënë se nuk është dëmtuar partneriteti me kryeministrin Haradinaj dhe me partnerët e koalicionit.

“E kemi thënë edhe më herët, se AKR-ja e ka bërë këtë Qeveri. AKR-ja e ka shpëtuar edhe tash këtë Qeveri”, është shprehur Matoshi.

Ai është i bindur se kjo Qeveri do ta çojë deri në fund mandatin qeverisës sepse, sipas tij, ky është edhe përkushtimi i AKR-së.

Ndërkaq kërkesën e opozitës për zgjedhje të reja e sheh si punë që i takon opozitës.