AKK: 19 % e zyrtarëve e deklaruan pasurinë

Rreth 800 zyrtarë të lartë publikë në Kosovë, ose 19 për qind e tyre e kanë deklaruar pasurinë e tyre në Agjencinë Kundër Korrupsionit (AKK), ashtu siç është paraparë me ligj. Edhe pse kanë kaluar 15 ditë nga dita kur ka filluar deklarimi i pasurisë së zyrtarëve të lartë, aplikimi për deklarim të pasurisë nga zyrtarët e lartë deri më tani është në numër të vogël pasi që numri i përgjithshëm i zyrtarëve që janë të obliguar të bëjnë deklarimin e pasurisë është rreth 4300 zyrtarë.

Sipas zyrtarëve të Agjencisë deri më tani vetëm 800 veta kanë deklaruar pasurinë nga 4300 sa duhet të jetë numri i përgjithshëm i zyrtarëve të lartë.

Hasan Preteni, drejtor i AKK-së, ka thënë se janë duke bërë apel të vazhdueshëm që të aplikojnë për deklarim të pasurisë. Ndërkohë, në 15 ditët e mbetura për aplikim për deklarim të pasurisë duhet të plotësojnë formularin edhe rreth 3.500 zyrtarë.

“Deri më tani nga numri i përgjithshëm rreth 4300 formularin për deklarimin e pasurisë e kane dorëzuar rreth 800 zyrtarë ose rreth 19%. Ne jemi duke bërë apel të vazhdueshëm, shpresoj se shumica dërmuese do të deklarojnë pasurinë. Agjencia i ka ndërmarrë të gjitha masat dhe deri në fund do të punojmë konform ligjit, përgjegjësia është individuale”, ka thënë ai. /Zëri/