Aida Dërguti: Deklaratat e ministres Gërvalla janë qëndrime të Qeverisë

Ish-deputetja dhe ish-nënkryetarja e Kuvendit të Kosovës, Aida Dërguti, ka thënë se nuk duhet kritikuar vetëm ministrja e Punëve të Jashtme, Donika Gërvalla lidhur me deklaratat e saj që nxitën reagime.

Dërguti thotë se deklaratat e Gërvallës, përfshirë ato që ajo i vlerëson si “anti-UÇK”, e deri te ajo e djeshmja, janë qëndrime të Qeverisë së Kosovës, raporton Express.

“Çka është gjithë ky sulm mbi ministren Gërvalla? Deklaratat e saj prej atyre anti UÇK e deri te kjo e fundit janë qëndrime te Qeverisë”, ka shkruar Dërguti në Facebook.

Ministrja e Punëve të Jashtme dhe Diasporës, Donika Gërvalla, ka thënë dje se Kosova nuk duhet ta fajësojë Bashkimin Evropian për gabimet e saj.

Ajo në një panel diskutimi në Forumin e Dubrovnikut ka thënë se Kosova duhet t’i kryejë detyrat e saj, duke nënkuptuar se vendi që ajo e përfaqëson nuk i ka përmbushur kriteret për liberalizimin e vizave.

“Prandaj, por mbi të gjitha për veten tonë, ne duhet të përmbushim detyrat tona: Duhet të ndërtojmë shtetin ligjor, duke përfshirë edhe të qenit të ashpër ndaj korrupsionit. Duhet të garantojmë lirinë e shtypit dhe të bëjmë reformë të vërtetë ligjore. Ne ende nuk kemi arritur aty. Dhe nuk asnjë arsye pse ta fajësojmë BE-në për gabimet tona”, thuhet ndër të tjera në fjalimin që vetë Gërvalla e publikoi të plotë dje në llogarinë e saj në Facebook.

Kjo deklaratë nxiti shumë reagime, në të cilat Gërvallës i rikujtohej se në BE deklarojnë se Kosova i ka përmbushur të gjitha kriteret për liberalizimin e vizave.