Ahmet Isufi: Autostrada e Gjilanit, projekt i bllokuar nga papërgjegjësia institucionale

Gjilan – Kandidati për deputet nga Aleanca për Ardhmërinë e Kosovës (AAK), Ahmet Isufi, ka kritikuar vonesat në realizimin e autostradës së Gjilanit, duke e cilësuar atë si një projekt me rëndësi strategjike për lidhjen ndërshqiptare dhe zhvillimin ekonomik të Anamoravës.

Sipas Isufit, autostrada nuk përfaqëson vetëm një investim infrastrukturor, por edhe një lidhje të rëndësishme mes qytetarëve dhe një shtyllë kryesore për zhvillimin ekonomik të rajonit. Megjithatë, ai thekson se ky projekt, i cili është dashur të përfundojë prej kohësh, vazhdon të mbetet i papërfunduar si pasojë e, siç u shpreh ai, papërgjegjësisë institucionale.

“Qytetarët e Gjilanit dhe Anamoravës nuk e meritojnë këtë neglizhencë,” ka deklaruar Isufi, duke shtuar se projekte të tilla mund të realizohen vetëm nga qeveri serioze, me vizion dhe përgjegjësi, e jo nga struktura që, sipas tij, merren me arsyetime.

Ai ka theksuar se Aleanca për Ardhmërinë e Kosovës është e gatshme të marrë përgjegjësinë për zhvillimin e Anamoravës dhe të gjithë Kosovës, duke vënë në fokus realizimin e projekteve të mëdha infrastrukturore dhe ekonomike./rajonipress/