AGK për rrahjen e Valon Sylës: Është sulm ndaj fjalës së lirë dhe demokracisë

Asociacioni i Gazetarëve të Kosovës ka reaguar pas sulmit fizik ndaj gazetarit Valon Syla, raporton Express

AGK deklaron se lidhur me këtë rast, ka kontaktuar edhe Policinë e Kosovës.

“Sot rreth orës 12:05, kemi pranuar informatën se në lagjen Pejton është sulmuar gazetari. Njësia policore ka arritur në vendin e ngjarjes dhe ka kontaktuar përmes telefonit me gazetarin, i cili ka deklaruar se për momentin nuk ka nevojë për trajtim mjekësor. Jemi duke e pritur për të marrë informata të tjera”, ka thënë Zëdhënësi i Policisë së Kosovës për AGK-në, Baki Kelani për AGK.

AGK ka kërkuar nga organet e rendit ta zbardhin këtë rast.

“AGK kërkon nga organet e drejtësisë që sa më shpejtë t’i hetojnë motivet e sulmit dhe ta zbardhin këtë rast, i cili në themel dëmton lirinë e shprehjes dhe medias. Secili sulm në drejtim të gazetarëve është sulm ndaj fjalës së lirë dhe demokracisë në vend”, thuhet në reagim.

Gazetari Valon Syla është sulmuar sot nga një person i panjohur, në mes të Prishtinës./Express/