AGK: Emërimi i Gërvallës si drejtor i RTK-së, konflikt interesi

Asociacioni i Gazetarëve të Kosovës ka reaguar ndaj procesit të përzgjedhjes së Rilind Gërvallës si drejtor i televizionit publik, RTK.

AGK-ja ka thënë se emërimi i Gërvallës përbën konflikt interesi dhe cënon pavarësinë e transmetuesit publik, raporton Zeri.info.

“Rekomandimi dhe emërimi i tij është në kundërshtim me praktikën e mirë që është krijuar gjatë përzgjedhjes së bordit të RTK-së, proces ky që ishte lavdëruar ndërkombëtarisht, si transparent dhe profesional”, thuhet në reagim.

Në reagim thuhet se ky zhvillim do të ndikojë negativisht në renditje e Kosovës sa i përket lirisë së mediave në botë.

“Ne besojmë që një proces i ri rekrutimi, në baza të meritokracisë dhe pa ndërhyje politike është i nevojshëm dhe do të lejonte vazhdimin e depolitizimit të transmetuesit publik, dhe do të krijonte atmosferë ku gazetarët mund të veprojnë të lirë pa presion politik”, thuhet ndër të tjera.

Kujtojmë se për këtë organizatat ndërkombëtare për lirinë e mediave i kanë shkruar letër kryeminstrit të Kosovës, Albin Kurti duke u shprehur të shqetësuara për emërimin e Gërvallës si drejtor i RTK-së. /Zëri/