Agim Vinca fitues i çmimit të parë i Orës letrare

Viti – Po vazhdojnë të mbahen aktivitete të ndryshme kulturore e sportive, në kuadër të Manifestimit “Flakadani i Karadakut 20015”, me që rast sot është mbajtur Ora e madhe letrare, në të cilën u lexuan 25 poezi të shkrimtarëve e krijuesve nga mbarë hapësirat shqiptare.

Duke përshëndetur të pranishmit, nënkryetari i komunës së Vitisë Hasan Aliu, është shprehur se krijuesit të cilët me prezencën e tyre e madhështuan Manifestimin e Flakadanit të Karadakut, janë po ata që tani në kohën e paqes po e fuqizoni edhe më shumë veprën e dëshmorit të kombit që ra për çlirimin e trojeve etnike.

“Vetë prezenca e juaj nga të gjitha trojet shqiptare e që sot jeni këtu në këtë ngjarje, tregon rrugën që ju po e trasoni për të cilën edhe ranë dëshmorët. Kjo formë e angazhimit me krijimet tuaja është historia më e mirë për gjeneratat dhe brezat e rinj që po na vijnë”, ka thënë Aliu.

Ndërsa në emër të këshillit organizativ të Orës Letrare, Ismajl Baftjari tha se është detyrë e jona njerëzore, humane, e patriotike që të përkujtojmë njerëzit e mëdhenj, njerëzit që kanë sakrifikuar gjënë më të shtrenjtë për interesa kombëtare e njerëzore.

Juria profesionale e kësaj ore letrare në përbërje Isak Shema, Xhemë Karadaku dhe Xhevat Latifi, ka vlerësuar krijimet më të dalluara nga 25 poezi që u deklamuan në këtë ngjarje kulturore.

Si poezia më e mirë që u nderua me çmimin e parë u veçua “Epitaf për të rënët në Tivar” e Agim Vincës, çmimi i dytë për Adem Gashin me poezinë “Atdheu” dhe vendi i tretë ju dha Elfete Mustafës me poezinë “Dje dhe sot”.

Në këtë ngjarje, u promovua edhe libri “Ashti i Kombit” i autorit Azgan Haklaj. Për pjesëmarrësit e Orës letrare, organizatorët i nderuan me mirënjohje, ndërkohë u shtrua një koktej në sallën e galerisë së Arteve në Viti./rajonipress/