Abrashi: Folëm me AAK-në e Nismën për program, nuk duam të humbim kohë

Zyrari i lartë i LDK-së, Arban Abrashi, thotë se takimet e sotme me zyrtarët e AAK-së dhe të Nismës ishin për programin dhe se nuk duan të humbin kohë, derisa po presin vendimin e Gjykatës Kushtetuese rreth çështjes së mandatarit.

“Sot ka qenë takimi i parë koordinues, ashtu siç kemi paralajmëruar. Kemi disa ditë deri në vendimin e Gjykatës Kushtetuese, prandaj këto po i shfrytëzojmë edhe në dobi tonën. Sot jemi takuar me përfaqësuesit e AAK-së dhe Nismës për ta trajtuar programin tonë qeverisës dhe kemi diskutuar orientimet e tona programore”, ka thënë Abrashi, transmeton Gazeta Express.

Ai tutje shton se, derisa pritet vendimi i Kushtetueses, deri më 29 maj, koalicioni LDK-AAK-Nisma dhe minoritetet do të vazhdojnë koordinimin për qeverisje.

“Ne do të fillojmë të shkëmbejmë dokumentet ditëve në vijim në nivel të ekspertëve partiakë, në mënyrë që kur të fillojmë punën në Qeveri, të kemi një program gjithëpërfshirës”, ka thënë Abrashi.

Abrashi ka pritje që vendimi i Gjykatës për mandatarin, të cilës Vetëvendosje i ka kërkuar intepretim, do të jetë në favor të LDK-së me partnerë.

“Besoj që po. Praktikat e parlamentit tregojnë që ai që e ka shumicën, e formon Qeverinë”, ka thënë zyrtari i LDK-së. /Express/