Abdixhiku: Të vetmit që flasin për rrëzimin e Qeverisë, janë në kabinetin e kryeministrit

Kryetari i Lidhjes Demokratike të Kosovës, Lumir Abdixhiku ka thënë se qeveria ndodhet në gjendje iluzioni, derisa ka kritikuar ekzekutivin dhe kryeministrin Albin Kurti për krizën ekonomike, atë në arsim e shëndetësi.

Abdixhiku tha sot se situata në Kosovë “nuk është më në gjendje normale”.

“Nga dhjetë mijë punëtorë po i humbim çdo muaj. A është kjo shpresa e premtuar për qytetarët e Kosovës? Kjo më nuk është gjendje normale por ne megjithatë kemi një qeveri që është në gjendje iluzioni, sepse ajo nuk i sheh vështirësitë e kompanive tona. Paratë i lë të bllokuara, e përtej forcës punëtore na largohen edhe ata në treg shëndetësor”, tha Abdixhiku.

“Kjo ikje, sidomos në shëndetësi, ku qeveria nuk ka bërë asgjë për dy vite, do të ketë pasoja për gjenerata të tëra”, vijoi lideri i LDK-së.

Ai tha se ka njerëz brenda kabinetit të kryeministrit Kurti, të cilët flasin për rrëzimin e qeverisë.

“Kryeministër, bëj zgjidhej për secilën krizë! Lirohu nga paranojat e argatëve të Serbisë, armiqve të padukshëm, për rrëzimin e qeverisë. Në fakt, njerëzit e vetëm që sot flasin për rrëzimin e qeverisë janë njerëzit tuaj në kabinet. Përveç, dhe këtë, mund ta kuptojmë ditëve në vijim nëse keni për qëllim mirëmbajtjen e krizave vet”, u shpreh Abdixhiku.