Kryetari i Lidhjes Demokratike të Kosovës, Lumir Abdixhiku, njëjtë si ai i Partisë Demokratike të Kosovës, Memli Krasniqi, në seancën e Kuvendit të enjten ka kritikuar kryeministrin Albin Kurti për mungesë transparence në dialog me Serbinë.
Ky i fundit njoftoi ditë më parë se e ka pranuar propozimin franko-gjerman për dialogun dhe këtë e bëri përmes një postimi në Twitter.
Por sipas Abdixhikut, askush nuk e di se çka përmban ky propozim i njohur si plani evropian.
“As unë e as LDK-ja dhe asnjë parti e asnjë deputet në këtë Kuvend nuk jemi në dijeni për përmbajtjen e saktë të draftit përfundimtar të dokumentit në fjalë, sepse nuk kemi qenë në negociata dhe s’ka qenë i informuar asnjëherë mbi këtë proces”, është shprehur i pari i PDK-së.
“Këtë të hënën nëpërmjet një postimi në Twitter, kuptuam se kryeministri e ka pranuar propozimin në fjalë. Si Kuvend si shoqëri dhe si Kosovë, askush nuk e di se çka ka pranuar kryeministri i Kosovës”.
Ndaj, Abdixhiku ka thënë se meqë kryeministri nuk po raporton në Kuvend për zhvillimet në dialog, dëshiron t’i shtrojë atij katër pyetje.
“Në marrëveshjen e pranuar a bëhet fjalë për një marrëveshje finale apo për një marrëveshje bazë? Marrëveshja e pranuar nga ju a e ka njohjen e ndërsjellë në qendër të saj, pra aktin ku Serbia e njeh Kosovën dhe anasjelltas? Marrëveshja e pranuar në parim a i ka elementet e platformës tuaj që na prezantuat në gusht 2022? Kjo marrëveshje a parasheh rikonsiderimin e të gjitha marrëveshjeve paraprake apo implementimin e të gjitha marrëveshjeve pa dallim”, ka pyetur ai. /Telegrafi/
