Abdixhiku: Kosovës i duhet një marrëveshje përfundimtare që në thelb ka njohjen e ndërsjellë mes dy vendeve

Kryetari i Lidhjes Demokratike të Kosovës (LDK), Lumir Abdixhiku, ka njoftuar se gjatë kësaj të hëne kanë mbajtur mbledhjen e Kryesisë së Lidhjes Demokratike të Kosovës, si dhe mbledhjen me kryetarët e Degëve.

“Në vlerësimin tonë, të anëtarësisë sonë, Kosovës nuk i duhet një marrëveshje bazë që nuk e përmban njohjen”, ka shkruar Abdixhiku.

Kreu i LDK-së ka theksuar se Kosovës i duhet një marrëveshje përfundimtare që në thelb ka njohjen e ndërsjellë ndërmjet dy vendeve – “si shtete të pavarura e sovrane”.

“Çdo devijim nga ky orientim strategjik është papërgjegjësi e pariparueshme e Qeverisë aktuale”, ka shtuar Abdixhiku.

Tutje ai ka njoftuar se në këtë proces, koordinimi i ngushtë me aleatë “mbetet jetik për të ardhmen euroatlantike të vendit tonë”.