Abazi: Terri i kthehet Gjilanit falë megapolitkës së kryetarit Haziri

Gjilan – Mungesa e ndriçimit publik në lagjet më të mëdha dhe më të frekuentuara të qytetit ka ndikuar që Sahit Abazi shef i grupit të PDK-së të reagojë dhe ta përkujtojë Lutfi Hazirin se ka harruar përse e ka marrë mandatin nga qytetarët e Gjilanit.

Lagjja e tetë ka dy ditë që ka mbetur pa ndriçim publik dhe në terr të plotë. Ngjashëm janë edhe disa lagje të mëdha të qytetit dhe e tërë kjo për shkak se komuna nuk i ka paguar borxhin rreth 140 mijë euro KEDS-it, raporton rajonipress.

Kjo ka ndikuar që shumë qytetarë të reagojnë tek këshilltarët komunal duke kërkuar sqarime prej tyre.

Sahit Abazi shef i grupit të PDK-së tha për rajonipress se ka marrë shumë ankesa nga qytetarët për mungesë të nderimit publik.”Terri po i kthehet Gjilanit sërish falë megapolitikës së kryetarit. Haziri sikur ka harruar përse e ka marrë mandatin nga qytetarët e Gjilanit. Ai po mendon se paguhet për t`i drejtuar punët e Kosovës, ndërkohë që ka dështuar të qeverisë komunën” tha Abazi.

Abazi tha se kryetari ka shkaktuar borxhe ndaj operatorit që shpërndanë energjinë dhe për pasojë sot shumica e qytetit të Gjilanit është në terr të plotë. “Gjilanit po i rikthehet terri e frika si rezultat i keqëmenaxhimit të komunës nga kryetari Haziri i cili duke u marrë me politikë të madhe ka lënë pasdore drejtimin e komunës së Gjilanit, i ka lënë fëmijët pa transport për bartje në shkolla, shkollat pa nxehje, qytetin pa drita dhe janë shtuar rastet e vjedhjeve dhe frikës”.

Abazi tha se shumë qytetar që kanë ikur nga rajoni i Gjilanit në Gjermani në ankesat e tyre pse e kanë braktisur vendin, pos tjerash kanë shkruar se u mungon ndriçimi publik dhe se kanë frikë të dërgojnë fëmijët në shkolla. “Vërtet e turpshme për këtë pushtet dhe e dhimbshme për ata qytetarë” tha Abazi./rajonipress/