AAK “zbut tonin”, nuk ndryshon qëndrim

Ofertat joshëse nuk do të mundë t’ia ndërrojnë mendjen AAK-së për ndryshim qëndrimi karshi Qeverisë. Partia e Ramush Haradinajt nuk e ka ndërmend të heqë dorë nga kërkesa për dorëheqjen e Qeverisë dhe anulimin e marrëveshjeve për Asociacionin dhe demarkacionin, pavarësisht se ditën e hënë, përmes një komunikate, AAK-ja kishte zbutur tonin duke kërkuar zgjidhje të krizës, e madje duke i bërë thirrje pozitës që të jenë pjesë e zgjidhjes.

Por, analistët e shohin të rrezikshëm manovrimin e mundshëm të AAK-së që të largohet nga opozita e bashkuar dhe duke hequr dorë nga kërkesat e tyre, pasi do të bënte vetëvrasje politike.

Drejtori i Marrëdhënieve me Publikun i AAK-së, Muharrem Nitaj, thotë se AAK-ja në vazhdimësi ka kërkuar zgjidhjen e krizës politike. Ai ka thënë për “Zërin” se ajo që AAK-ja ka kërkuar nga partnerët e Qeverisë së koalicionit, ka qenë që edhe ata të jenë pjesë e zgjidhjes së krizës që e kanë shkaktuar vetë, dhe të mos bëjnë përpjekje që duke e thelluar atë, ta provojnë amnistimin e tyre./zeri/