AAK themelon degën e saj edhe në Zhegër

Gjilan – Kryetari i AAK-së Dega në Gjilan Rexhep Kadriu, kryetari i AAK-së Ramush Haradinaj, nënkryetari i AAK-së Ahmet Isufi si dhe anëtarë të tjerë të AAK-së, gjatë ditës së djeshme kanë qëndruar në Zhegër, ku është themeluar dega më e re e AAK-së, në përkrahje të krijimit të komunës së Zhegrës.

Me këtë rast, kryetari i AAK-së në Gjilan Rexhep Kadriu, i cili ka përkrahur fuqishëm krijimin e Degës së AAK-së në Zhegër, ka thënë se AAK gjithmonë ka qenë dhe është për formimin e Zhegrës Komunë.

“Ne sot po marrim një hap shumë të rëndësishëm drejt këtij synimi dhe po japim shembullin më të mirë se AAK është themeluar për popull dhe do të jetë afër popullit gjithmonë”, ka shtuar kryetari Kadriu.

Ideja për themelimin e Degës së AAK-së në Zhegër, si vullnet dhe dëshirë e kamotshme e kryetarit Ramush Haradinaj, është mbështetur fuqishëm nga Dega e AAK-së në Gjilan dhe nënkryetari i AAK-së Ahmet Isufi.

Përpos themelimit të Degës së AAK-së në Zhegër, kryetari i AAK-së në Gjilan Rexhep Kadriu, kryetari i AAK-së Ramush Haradinaj, nënkryetari i AAK-së Ahmet Isufi si dhe të tjerë, kanë vizituar familjen e heroit Agim Ramadani, në shenjë përkujtimi dhe respekti të veprës së madhe kombëtare. Ata thanë se Aleanca për Ardhmërinë e Kosovës, do të përkujtojë dhe vlerësojë gjithmonë gjakun e derdhur për lirinë që ne gëzojmë sot./rajonipress/