AAK synon shtet të së drejtës

Riza Smaka, kryesues i Departamentit të Drejtësisë në Aleancën për Ardhmërinë e Kosovës (AAK), tha se AAK-ja synon ndërtimin dhe funksionalizimin e Kosovës, shtet të së drejtës.

Ai tha se për arritjen e objektivit në fjalë, kërkohet krijimi i infrastrukturës ligjore konsistente e koherente me legjislacionin e Bashkimit Evropian (BE), gjithnjë të përshtatur me rrethanat shoqërore-politike, kulturore, arsimore, tradicionale e historike të vendit tonë, Kosovës.

“Rrjedhimisht, infrastruktura ligjore e tillë, në sajë të institucioneve publike, të formuara konform me ligjin e aplikuar dhe të vullnetit dhe devocionit politik, do të implementohet me konsekuencë.

Aktualisht, në vendin tonë, rendi juridik, gjithnjë, nuk është i kompletuar sa dhe si kërkohet, e jo pak akte ligjore përmbajnë defekte onomoteknike, për ç’shkak, në Kuvend janë mbi 66 të tilla për modifikime, ani pse janë miratuar brenda këtyre viteve, në një anë, dhe një numër i konsiderueshëm i akteve ligjore nuk është miratuar”, tha Smaka. Sipas tij, Qeveria e Kosovës gjithnjë organizohet sipas nevojave partizane partiake dhe proporcionalisht me numrin e banorëve dhe sipërfaqen e vendit është kabineti qeveritar më kuantitativ (më i ngarkuar) në Evropë.

Ai tha se rrjedhimisht, edhe funksionaliteti i dobët i sistemit të drejtësisë dhe i administratës publike, në masë të konsiderueshme janë pasojë e infrastrukturës së tillë ligjore. /Zëri/