Eko Higjiena

AAK kundërshton privatizimin e çerdhes në Integj

/ 2 minuta lexim

Gjilan – Rexhep Kadriu dhe Kryesia e AAK-së Dega në Gjilan, kanë reaguar ndaj privatizimit të qendrës “Integj” në Gjilan, nga Agjensioni Kosovar i Privatizimit.
“Ne e kuptojmë rëndësinë e procesit të privatizimit si hallkë kryesore e kalimit të tranzicionit, por megjithatë, ky proces duhet t`i përshtatet rrethanave dhe mjedisit.

Shitja e aseteve me likuidim të ndërtesave të cilat janë të nevojshme dhe në interes për qytetarët si dhe gjenerojnë produktivitet për shtetin, duhet të intervenohet që shitja e këtyre aseteve të mos ndodhë. Rast konkret është shitja e aseteve të ndërtesës (P+1) me sipërfaqe 742 metra katrorë së bashku me oborrin që e rrethon, i cili përbënë sipërfaqen totale prej 9020 metra katrorë” thuhet në reagimin e AAK-së.

Hidromorava

Sipas kryetarit të AAK-së Rexhep Kadriu për çerdhen e fëmijëve “Integj” në Gjilan, komuna është dashur të bëjë marrëveshje me AKP-në për ndërrim të pronës për shkak të nevojës që kanë qytetarët për këtë institucion, pasi që në Komunën e Gjilanit kanë qenë tri çerdhe të kësaj natyre, njëra te shkolla fillore “ Thimi Mitko”, e cila është mbyllur dhe ka kaluar në një objekt privat ku paguhet qeraja prej 800 euro për çdo muaj dhe “Integji”, e cila po privatizohet dhe rrjedhimisht Komuna e Gjilanit po mbetet me një çerdhe të vetme, atë “Ardhmëria” në Dardani.

“Arsyeja pse nuk duhet të ndodhë është mungesa e madhe që Gjilani ka për institucionet parashkollore, institucione këto vitale për zhvillimin e shoqërisë. Ndërsa Kuvendi Komunal, nuk po bënë asnjë përpjekje për ndalimin e kësaj dukurie, përderisa duhet të bëjë përpjekje maksimale për shtimin e numrit të këtyre institucioneve, ku dihet mirë se në çdo 10 mijë banorë duhet që së paku të ekzistojë një institucion parashkollor” mendon Kadriu./rajonipress/