A shkakton ngrënia në këmbë dhembje stomaku?

Teksa jeta bëhet gjithnjë e më e shpejtë dhe shumë prej nesh po mjaftohen vetëm me një kafshatë të ngrënë nxitimthi, lind dyshimi nëse ngrënia në këmbë ka efekte anësore.

Po na mbetet gjithnjë e më pak kohë për të ngrënë në ditët e sotme. Të hash në këmbë është bërë një zakon në të gjitha vendet e botës. Dispepsia ose dhembja e stomakut, është një ndjenjë e fortë dhembjeje në pjesën e sipërme të stomakut, që ndodh të prekë personat që hanë në këmbë.

Mirëserdhët në botën e atyre që hanë shpejt, ku do të zbuloni problemet e tyre me tretjen. Sipas një studimi të ri fëmijët, që hanë të njëjtin ushqim si prindërit, janë më të shëndetshëm. Tradita e shprehjes “vakti i drekës” po shuhet ngadalë në të gjithë botën, madje edhe në Francë, ku ka ekzistuar prej kohësh ngrënia në grup.

Secili po rrëmben nga një kafshatë dhe po sulet në punët e tij, pa menduar gjatë për pasojat.

Gjithnjë është menduar se dhembja e lehtë, që na shkaktohet pas ngrënies dhe lëvizjes së menjëhershme tregon për ndonjë ndërlikim shëndetësor, por shkencëtarët thonë të kundërtën.

Dispepsia është më shumë e lidhur me stilin e jetës si duhani, kafeja, alkooli, ngrënia e ushqimeve të dëmshme, stresi dhe me mënyrën sesi flemë, por në këtë listë të gjatë nuk përfshihet ngrënia e ushqimit në këmbë.

Në fakt doktorët këshillojnë të kundërtën, për të shpëtuar nga dhembja e shkaktuar prej acidit, që kthehet pas në ezofag. Kjo është një nga dobitë e gravitetit. Qëndrimi në këmbë gjatë ose pas ngrënies, ndihmon ruajtjen e acidit në stomak dhe jo ngritjen e tij lart, në ezofag. Për këtë arsye, shumë pacientëve që vuajnë nga kjo gjendje, u këshillohet që ta mbajnë kokën pak më lart teksa flenë.

Por kjo nuk është e gjitha, ngrënia në këmbë ka edhe problemet e saj. Teksa qëndrojmë në këmbë, priremi t’i bëjmë gjërat shpejt. Kjo është arsyeja përse kompanitë bashkëkohore instalojnë tavolina gjysmë të larta, ku njerëzit qëndrojnë në këmbë. Sipas studimeve, takimet e zhvilluara ulur zgjasin rreth 34 për qind më gjatë se ato të mbajtura në këmbë.

Pra, një pasojë negative e ngrënies në këmbë, është shpejtësia me të cilën ju prireni të konsumoni ushqimin. Kjo ndodh për shkakun e cilësuar më lart, të mungesës së karrigeve, që do t’ju mundësonin një ngrënie të ngadaltë dhe shpërqendrim më të madh.

Ekzistojnë shumë pak studime, që janë marrë me shpejtësinë e ngrënies së ushqimit, ndoshta sepse është e vështirë të përgjithësosh këtë kohë, që secili e kalon në mënyrë private.

Një studim i vitit 1994 kërkoi mbi shpejtësinë e të ngrënit përmes një vëzhgimi të kryer mbi zakonet e ushqimit. U zbulua se shpejtësia nuk kishte asnjë lidhje me dhembjet e stomakut. Një tjetër studim i vitit 2010 e përforcoi këtë gjetje, por duke theksuar se mbetet në dorë të secilit të gjykojë mbi shpejtësinë, me të cilën duhet të ushqehet.

Ky problem u vëzhgua më afër në Korenë e Jugut, ku studiuesit investiguan një grup rekrutësh infermierë të Akademisë Ushtarake. Regjimi ditor ishte i njëjtë për të gjithë, ata zgjoheshin, hanin dhe më pas kryenin ushtrime, pra ishin njerëzit e duhur për t’i dhënë një përgjigje të saktë pyetjes “A ndikon shpejtësia e ngrënies në dhembjet e stomakut?”.

E vetmja kohë që secili prej rekrutëve e shpenzonte pak më ndryshe se të tjerët, ishte ajo e ngrënies. Pas një analize të hollësishme, u zbulua se shpejtësia e ngrënies tek të gjithë të testuarit, ndikonte shumë pak, thuajse aspak, mbi dispepsinë ose dhimbjet e stomakut.

Rekordin Botëror Guinness për ngrënien më të shpejtë e mban një amerikan, i cili është në gjendje të hajë një picë me diametër 30 centimetra për 41.31 sekonda.

Një tjetër rekord është ai i një japonezi, Takeru Kobayashi, i cili mund të hajë 58 salsiçe për 10 minuta.