A po pastrohet ATK-ja nga korrupsioni, apo po rehatohen militantët?

Ndryshimet në menaxhmentin e Agjencisë për mbledhjen e tatimeve. Kaçaniku: Ndryshimet, për t’i matur partitë forcat.

“Në këtë rast ekstrem edhe largimi i tyre me idenë e zëvendësimit me militantë të partisë që menaxhon institucionin nënkupton vetëm vazhdimësi të së njëjtit mentalitet të qeverisjes dhe rrjedhimisht nuk do të duhej të na befasonte”, thotë deputeti Bislimi

Ndërrimet që janë bërë e po bëhen kohët e fundit në strukturën drejtuese të ATK-së, që kur në krye të detyrës ka ardhur si ushtrues detyre i drejtorit Nahit Sharku, po ngjallin dilemën e analistëve nëse kjo po bëhet për ta pastruar ATK-në nga korrupsioni, apo për të rehatuar njerëzit e politikës. ATK-ja nuk është përgjigjur në pyetjet e gazetës se përse po bëhen këto ndryshime në menaxhmentin e ATK-së. Ndërkohë, deputeti i Kuvendit të Kosovës, Enver Hoti, nga Nisma për Kosovën, është i mendimit se këto ndryshime po e ngjallin dilemën se a po riorganizohet dhe spastrohet” ATK-ja për të ndaluar dallaveret dhe korrupsionin, apo për të sjellë më afër “kulaçit” edhe njerëzit e pushtetit të ri, LDK-së./kosova sot/