A duhet të hesht LDK-ja ndaj deklaratave të dëshmitarëve në Gjykatën Speciale që thirren në emër të saj?

Nga Shefik Sadiku – Në Gjykatën Speciale në Hagë ku po zhvillohet procesi ndaj krerëve të UÇK-së, disa dëshmitarë po deklarohen si viktima të UÇK-së gjatë luftës në Kosovë me faktin se këta gjoja paskan qenë ose pjesëtarë të LDK-së ose përkrahës së saj. Ç/është e vërteta secili ka të drejtë të deklarohet nëse është pjesëtar apo përkrahës i një orientimi të caktuar politik, por askush nuk ka të drejtë që me vetëdije apo pa të ta keqpërdor emrin e një partie politike për qëllime të veta personale, sepse çdo parti sa do e vogël të jetë ajo, megjithatë ajo është më e madhe se individi. Nisur nga ky fakt mendoj se LDK-ja, si parti, duhet të distancohet nga deklaratat e këtyre dëshmitarëve që po thirren apo po maskohen nën aureolën e partisë.

1. Sepse LDK-ja, si parti politike, vizion ka pasur çlirimin e Kosovës, prandaj nuk qëndron fakti se UÇK-ja, si forcë ushtarake, ka pasur synim luftimin e pjesëtarëve apo përkrahësve të partive të caktuara.
2. Unë mendoj se shumica e pjesëtarëve të UÇK-së, si ushtarë të zakonshëm, kanë qenë ose pjesëtarë ose përkrahës të LDK-së, sepse aso kohe organizim partiak e politik dhe gjithëpopullor ishte LDK-ja, pavarësisht asaj se zyrtarisht nuk ishte pjesë e rezistencës së armatosur për arsye, besoj të ditura. Nisur nga kjo del e vërteta se numri më i madh edhe i ushtarëve të UÇK-së edhe i anëtarëve dhe simpatizantëve të LDK-së nuk kanë pasur njohuri se UÇK-në, si formacion ushtarak ,e ka themeluar LPK-ja. Logjikisht, përmbajtësish dhe praktikisht del se, UÇK-ja nuk kishte target anëtarët apo përkrahësit e LDK-së, por ushtarët, policët, paramilitarët serbë.
3. Të ndaluarit, të arrestuarit të vetëashtuquajturit anëtarë të LDK-së , në zona të kontrolluara nga UÇK-ja, për qëllime identifikimi dhe verifikimi se kush hyn në ato zona të caktuara pa ndonjë arsyetim apo autorizim, që sot mund të jenë dëshmitarë potencialë në Gjykatën Speciale, në fund të fundit , nuk janë emra autoritativë dhe me peshë në LDK! Prandaj pse të tillët të ndalohen vetëm e vetëm pse kanë qenë anëtarë të zakonshëm apo përkrahës të LDK-së ? Pak e besueshme për të qenë e vërtetë.
4. Deklaratat e mundshme të disa nga të ashtuquajturve anëtarë të LDK-së si viktima, të cilët gjithë ndalimin e tyre nga UÇK-ja e arsyetojnë me vetëm përkatësinë apo simpatinë e tyre për LDK-në, jo që nuk i bën nderë LDK-së, por ,përkundrazi, e etiketon atë(LDK-në) si anti UÇK, përkundër së vërtetës se LDK-ja asnjë herë nuk ka deklaruar publikisht se është kundër luftës për çlirim.
5. Qëllimet përfituese personale të natyrave të ndryshme të disa dëshmitarëve potencialë si viktima të gjoja përkatësisë së tyre politike, LDK-ja nuk duhet lejuar që ato të adresohen në emër apo llogari të saj.
6. LDK-ja dhe gjithë qytetarët e Kosovës, pavarësisht animeve të tyre politike, duhet të kërkojnë nga Gjykata Speciale, por jo vetëm nga ajo, që të zbardhet çdo e vërtetë që është interes i vendit tonë, por LDK-ja dhe gjithë qytetarët e vendit duhet të kërkojnë që asgjë për gjënë më të shenjtë, për drejtësinë, nuk guxon të vihet në dyshim asnjë individ, asnjë organizatë, asnjë institucion prandaj as LDK-ja.
7. LDK-ja është organizatë e madhe dhe me traditë politike, si e tillë interesat meskine të mundshme të ndonjë dëshmitari nuk duhet lejuar që ta vënë në dyshim orientimin e saj demokratik, patriotik e shtetndërtues, prandaj i takon asaj që në emrin e saj të flet e të reagojë aty dhe atëherë kur e sheh se emri i saj edhe mund të keqpërdoret.

Lufta e Ushtrisë Çlirimtare të Kosovës nuk ka qenë luftë kundër shqiptarëve, por kundër Serbisë, në të kundërtën ajo nuk do ta kishte gëzuar përkrahjen popullore.
Ajo, UÇK-ja nuk ka qenë ushtri i përmasave të ushtrive të vendeve të mëdha, siç e imagjinojnë dhe e paragjykojnë disa, sepse rrethanat historike nuk kanë lejuar diçka më të madhe se kaç, por gjithsesi më të organizuar kemi mundur ta bëjmë po të kishim vepruar më arsyeshëm.