Zyrtare: Mehmeti rikthehet në Malmo

Agon Mehmeti është rikthyer në Suedi pas aventurës në Itali dhe Portugali. Ai ka nënshkruar me skuadrën e Malmos, ku kishte bërë emër si futbollistë. Sulmuesi kosovar është i lumtur për këtë transferim.

Agon Mehmeti ka vendosur që sërish të rikthehet në futbollin suedez pas një aventure në Itali dhe Portugali. Ashtu siç pritej, sulmuesi kosovar ka nënshkruar me skuadrën e Malmos, ku kishte bërë emër si futbollistë.

Prishtinasi ka nënshkruar kontratë për tre vite e gjysmë me kampionin e Suedisë, derisa është i lumtur për këtë transferim.

“Është një ndjenjë e madhe për tu ardhur në shtëpi, dhe do të jetë kënaqësi për të luajtur sërish në një tjetër kampionatin kombëtar”, ka deklaruar Mehmeti në konferencën për media, ku është prezantuar si lojtar i ri i Malmos.

Kurse, drejtori sportiv i Malmos, Daniel Andersson, e ka mirëpritur rikthimin e Mehmetit në Swedbank Stadion

“Është gjithmonë kënaqësi kur lojtarët tanë i kemi rikthyer në ekip. Agoni ka kapacitet të lartë dhe është zhvilluar edhe më shumë që prej kur ka ikur”, ka deklaruar Andersson.

Agon Mehmeti ishte pjesë e Malmos nga vitit 2001 e deri më 2011. Më pas u transferua te Palermo, por nuk arriti të zërë vend në ekip.

Fillimisht, ai ishte huazuar te skuadra e Novaras, derisa së fundi ka qenë te klubi portugez, Olhanense.