Ekipi ideal i Botërorit

Botërori dalëngadalë po merr fund dhe është koha për t’i bërë llogaritë. Gazetarët e agjencisë “Reuters” e kanë zgjedhur ekipin më të mirë të këtij kompeticioni, i cili përbëhet nga një formacion 4-3-3.

Portier: Keylor Navas – Njëra prej të veçantave të Botërorit ishte edhe niveli i lartë që e treguan portierët në Botëror. Navas bëri paraqitje të shkëlqyeshme në fazën e grupeve.

Mbrojtës i djathtë: Philipp Lahm – Njëri prej më të mirëve në pozitën e tij ndër vite, por e kaloi fazën e grupeve, duke luajtur në mesfushë ku askush s’e priste. Lahm luan çdo kund.

Qendërmbrojtës: Mats Hummels – Së bashku me Per Mertesacker apo me Jerome Boateng, Hummels ka qenë një pasuri për Gjermaninë, ndërsa ka kontribuar edhe me dy gola.

Qendërmbrojtës: Thiago Silva – Rëndësia e tij për Brazilin u vërejt kur mungoi në gjysmëfinale, teksa skuadra e tij humbi 7:1 nga Gjermania. Një lojtar vital, stabil dhe “mur” për kundërshtarët.

Mbrojtës i majtë: Marcos Rojo – Një tjetër lojtar i cili e vuajti suspendimin, pas paraqitjeve impresionuese në fazën e grupeve. Pa të, Argjentina hasi në vështirësi ndaj Belgjikës.

Mesfushor: Javier Mascherano – Një siguri absolute në mesfushën e Argjentinës, Mascherano është tipi i lojtarit, fizikisht dhe emocionalisht, të cilin të gjitha klubet e mëdha e duan.

Mesfushor: Arjen Robben – Edhe një herë e konfirmoi se simulimet janë pjesë e pandashme të tij, por ai bëri një Botëror impresionues. Thjesht, ishte i pandalshëm për kundërshtarët.

Mesfushor: James Rodriguez – I vetmi “anonim” i zgjedhur nga më shumë se 30 gazetarë të “Reuters”-it, Rodriguez e meritoi të jetë në ekipin e Botërorit. Gjashtë gola nga pesë ndeshje plus asistime s’janë pak.

Sulmues: Neymar – Edhe pse Botërori për të mori fund më herët, Neymar pati paraqitje impresionuese. Ai e mposhti presionin dhe shkëlqeu, duke realizuar katër gola për Brazilin.

Sulmues: Thomas Mueller – Pasi shënoi pesë gola në Botërorin 2010, ia shtoi edhe pesë të tjera në Brazil, Muller ishte edhe këtë herë fytyra kryesore e Gjermanisë.

Sulmues: Lionel Messi – E shënoi golin e parë në Botëror pas tetë vjetësh, në ndeshje me Bosnje e Hercegovinën, ndërsa i shtoi edhe tre të tjerë, duke e udhëhequr Argjentinën drejt finales./zeri/