A do ta shpëtonte Belgjikën inkuadrimi i Januzajt?

Belgjika u eliminua nga Argjentina në çerekfinale të Botërorit. Gjithsesi, një inkuadrim potencial i Adnan Januzajt në pjesën e dytë mund t’i ndryshonte gjërat në fushë.

Argjentina e Lionel Messit kaloi më lehtë se që pritej përballë Belgjikës së Adnan Januzajt.

Gjithsesi, për dallim nga Messi, futbollisti kosovar nuk shijoi asnjë minutë në këtë sfidë, madje as për t’u nxehur.

Përzgjedhësi belg, Marc Wilmots, në zëvendësimin e tij të fundit e përdori anësorin, Nacer Chadli, duke injoruar Adnanin.

Por, veprimi i Wilmots në fundin e takimit u tregua tejet i gabuar, pasi Chadli nuk i dha asgjë të re lojës belge.

Në anën tjetër, me dy lojtarë shtatlartë në zonën e argjentinasve si Lukaku e Fellaini, harkimet e sakta të Adnanit do të mund ta ndryshonin fatin e Belgjikës.

Veprimi i përzgjedhësit belg po kritikohet me të madhe edhe në Belgjikë, përmes postimeve në rrjetet sociale.