Në zgjedhje me nguti – rrezik nga manipulimet

Presidentja e Kosovës, Atifete Jahajga pritet që sot (e enjte) të dekretojë shpërbërjen e Kuvendit të Kosovës dhe shpalljen e zgjedhjeve të parakohshme për datën 8 qershor, kërkesë kjo e dy partive më të mëdha PDK e LDK, por që është përkrahur edhe nga disa parti tjera, përjashtuar këtu Vetëvendosjen dhe AKR-në, të cilat kërkojnë që 15 qershori të jetë data e zgjedhjeve.

Menjëherë pas votimit të mocionit për shpërbërjen e Kuvendit, e para e shtetit ka filluar t’i thërrasë në takim partitë politike për t’u konsultuar për datën. I pari që shkoi në zyrën e presidentes ishte kreu i PDK-së, Hashim Thaçi.

“Ne jemi përcaktuar që të shkohet më 8 qershor. Mendoj që ky është opinioni i shumicës së partive dhe kjo është normal dhe më e përshtatshme dhe mendoj se partitë janë të përgatitura”, ka thënë Thaçi, shkruan “Tribuna”.

Për 8 qershorin është pajtuar edhe kreu i LDK-së, Isa Mustafa. “Në qershor mund të bëhen zgjedhje të mira dhe kjo kohë është koha që duhet të instalojmë si periudhë për të gjitha zgjedhjet e Kosovës”, ka thënë Mustafa. Për dallim nga Thaçi e Mustafa, 8 qershorin e refuzuan kreu i Vetëvendosjes, Albin Kurti dhe kryetari i AKR-së, Behgjet Pacolli. /Tribuna/