Selver Lenjani: Nuk na trembin deklaratat e Nikoliqit

Gjilan – Selver Lenjani përfaqësues nga fshati Karaqevë thotë se deklaratat e fundit të Tomisllav Nikoliqit për nxitje lufte me Kosovën nuk e frikësojnë brezin kufitar. Frika e vetme për ne mbetet humbja e territorit të Kosovës në mënyrë diplomatike dhe në tavolina të bisedimeve shprehet ai.

Lenjani thotë se nuk e kanë ndërmend të frikësohen edhe nëse prania e xhandarmërisë është e madhe në kufi. “Ne jemi mësuar me praninë e xhandarmërisë e cila ka vite të tëra që hyn e del në brendi të territorit të Kosovës. Për ne frika më e madhe është humbja e territorit në tavolinat e bisedimeve. As këtë fakt nuk do ta lejojmë sepse të gjitha argumentet janë në anën tonë” shprehet Lenjani.

Lenjani tha se ditëve të fundit ka një koncentrim të ushtrisë serbe, por KFOR-i dhe policia e Kosovës janë të pranishme në zonat kufitare. “Nuk ka ndonjë frikë tek banorët sepse këtë e dëshirojnë ushtria serbe. Do të jemi gjakftohtë ndaj këtyre provokimeve, por nuk do të rrimë duarkryq nëse në pyetje vije humbja e territorit të Kosovës” shprehet Lenjani./rajonipress/