Haliti: Obligohemi ndaj të rënëve që ta ndërtojmë një Kosovë progresive

Viti – Në këtë ditë të lavdishme, duke kujtuar të kaluarën dhe historinë, ne ia kujtojmë vetës obligimet që kemi ndaj të gjithë atyre që ranë, u sakrifikuan dhe kontribuuan për lirinë, demokracinë dhe pavarësinë e Kosovës. Po ashtu, në këtë ditë të rëndësishme, ne duhet të jemi të vetëdijshëm se obligohemi para brezave të ardhshëm që të punojmë dhe ta ndërtojmë një vend prosperues, i cili do të jetë atdheu i sigurt i qytetarëve tanë ka thënë Sokol Haliti.

Kuvendi Komunal ka mbajtur sot një Seancë solemne e cila i ka paraprirë aktiviteteve të sotme që janë paraparë të bahen për Ditën e çlirimit të komunës së Vitisë.

Me rastin e kësaj dite, janë bërë homazhe tek varrezat e dëshmorëve, si dhe janë vu kurora lulesh nga përfaqësues të institucioneve komunale,subjektet politike, Organizatat e dala nga lufta, Institucionet tjera, policia, gjykata, QKMF-ja, familjet e dëshmorëve etj.

Në seancën solemne të kryesuar nga kryetari i Kuvendit Naim Pira, ishin të pranishëm përpos këshilltarëve edhe përfaqësues të subjekteve tjera politike, institucioneve tjera, përfaqësues të organizatave e shoqatave si dhe qytetarë të tjerë.

Fjalën e rastit e mbajti kryetari i komunës së Vitisë Sokol Haliti, i cili ndër të tjerash tha se 14 Qershori i vitit 1999 ishte dita kur qytetarët e Komunës së Vitisë, përfundimisht frymuan lirshëm nga dhuna dhe agresioni pushtues serb, si dhe ishte dita kur qytetarët e Komunës sonë pas përpjekjeve gati shekullore e realizuan aspiratën e vet nacionale për liri e demokraci. “Në këtë ditë të lavdishme, duke kujtuar të kaluarën dhe historinë, ne ia kujtojmë vetës obligimet që kemi ndaj të gjithë atyre që ranë, u sakrifikuan dhe kontribuuan për lirinë, demokracinë dhe pavarësinë e Kosovës. Po ashtu, në këtë ditë të rëndësishme, ne duhet të jemi të vetëdijshëm se obligohemi para brezave të ardhshëm që të punojmë dhe ta ndërtojmë një vend prosperues, i cili do të jetë atdheu i sigurt i qytetarëve tanë. Populli i Kosovës dhe qytetarët tanë, për 10 vite me radhë, që kur pushteti serb uzurpoi, dëboi nga puna, persekutoi, vrau e u mundua të na gjunjëzoi, megjithatë ky popull tregoi se është i aftë të organizohet edhe në kushte robërie dhe duke krijuar një miqësi të fortë me miq e shtete që vendosin për fatin e globit. Duke i organizuar institucionet relevante, duke organizuar edhe shkollimin pasi që objektet shkollore u mbyllën nga pushtuesi serb, e mandej duke organizuar edhe luftën e armatosur, u dëshmua se shqiptarët e duan lirinë dhe se nuk ka çmim që ata s’do të jenë të gatshëm ta paguajnë, për të arritur lirinë si vlerë universale më e çmuar e njerëzimit. Mbi këtë bazë, ne sot duhet të jemi shumëfish më të motivuar që të ndërtojmë shtetin tonë të ri, duke e bërë atë funksional e demokratik dhe vetëm në shërbim të popullit. Vetëm të kujtojmë periudhën e viteve nga demonstratat e 1981 e deri te lufta e fundit e lavdishme të UÇK-së, dhe ata mijëra djem e vajza më të mirët që pati atdheu, që me gjakun e tyre bënë që liria të vijë. Janë po këta djem e vajza që pasi u mishëruan me kushtrimin e komandantit Adem Jashari, para 16 vitesh u futën triumfalisht në qytetin tonë, duke hapur epokën e re për komunën tonë, epokën e lirisë, paqes dhe ndërtimit të përgjithshëm. Në këtë ditë, secili nga ne e kujton NATO-në e cila pas një fushatë të bombardimeve arriti që në këtë ditë të vitit 1999, përfundimisht, së bashku me forcat tona, ta realizojë çlirimin e Kosovës, duke i obliguar forcat ushtarake policore e paramilitare serbe që ta lëshojnë Kosovën dhe duke i hapur dyert për popullin e përndjekur dhe të deportuar që të kthehen në vatrat e tyre. Për këtë gjë populli i Kosovës do të jetë përherë mirënjohës miqve të saj të shumtë, në krye me shtetet e Bashkuara të Amerikës, të cilët ndihmuan që ëndrra e lirisë dhe pavarësisë të bëhet duke ndërtuar dhe realizuar një shtet të tipit demokratik, evropian dhe perëndimor, me synime reale për t’u anëtarësuar në strukturat politike e ekonomike të Bashkimit Evropian, që të jetë pjesë e NATO-s, dhe siç thoshte themeluesi historik i shtetit të Kosovës dr Ibrahim Rugova, “duke synuar marrëdhënie permanente me Shtetet e Bashkuara të Amerikës”, tha kryetari Haliti./rajonipress/