Komiteti i Arsimit përkrah propozimin për stimulimin e nxënësve të bujqësisë me bursa

Gjilan – Komiteti i Arsimit (KA) në Gjilan i ka dhënë përkrahje propozimit të Drejtorisë së Arsimit për ndarjen e 50 bursave për nxënësit e shkollës së Agrobiznesit, si nevojë për motivimin e të rinjve për drejtimet profesionale, ku aktualisht interesimi është shumë i ultë. Njëherësh, KA ka kërkuar të shikohen mundësitë për rritjen e numrit të bursistëve.Arben Mehmeti, kryesues i Komitetit të Arsimit, ka thënë se kjo trupë komunale mund të kërkojë rritjen e numrit të bursave, por problem është sigurimi i mjeteve, për shkak të vështirësive financiare.

Nazmi Musa, drejtor i Arsimit, ka thënë se shkolla e Agrobiznesit rrezikon të mbyllet në të ardhmen, për shkak të numrit të vogël të nxënësve. Ndarja e bursave për nxënësit e bujqësisë do të jetë pjesë e konkursit për regjistrim në shkollat e mesme, ka thënë Musa, duke sqaruar se për këtë qëllim është planifikuar një shumë e mjeteve prej 17.500 euro.

Fehmi Sylejmani (VV) tha se stimulimi nxënësve të bujqësisë me bursa, është ideja më kreative e Drejtorisë së Arsimit, kurse Shukrije Rapuca (PDK) ka thënë se Gjilani është kampion për prodhime bujqësore, prandaj nuk duhet të kursej kur është në pyetje stimulimi i të rinjve për t`i orientuar në shkollën e agrobiznesit.

Njëherësh, KA është njoftuar nga drejtori Nazmi Musa se kanë përfunduar procedurat e emërtimit dhe riemërtimit të disa shkollave, ndërsa për disa të tjera, MASHT-i ka kërkuar plotësim të propozimeve.

Kësisoj shkolla “Abaz Ajeti” prej shtatorit të këtij viti do të quhet “7 Marsi”, shkolla në lagjen “Zabeli…” që deri tani ka qenë e pa emërtuar, do të quhet “Zija
Shemsiu”, kurse shkolla e mesme e Artit Pamor do të mbajë emrin “Adem Kastrati”.

Për tri shkolla tjera, gjimnazin e ri, që është propozuar të quhet “Xhavit Ahmeti”, shkollën në lagjen “Kodra e Dëshmorëve” (e njohur si lagja 2), që është propozuar të quhet “Sadullah Brestovci” si dhe për shkollën në Lagjen e Re (e njohur si lagja 8), që është propozuar të mbajë emrin “Nazmi Hoxha”, është kërkuar plotësimi i procedurave.

Edhe Kishnapola ka kërkuar riemërtimin e shkollës së fshatit, nga “Afërdita” në “Nijazi Osmani”. Edhe kjo dosje duhet të plotësohet, ka thënë Musa, duke nënvizuar se të gjitha propozimet janë bërë nga këshillat e shkollave. Detyura e DKA-së ka qenë që t`i përcjellë propozimet në MASHT, që është përgjegjës për emërtimin e shkollave, në bazë të propozimeve të dërguara.

KA është njoftuar edhe me rezultatet e testit të arritshmërisë. Nazmi Musa, drejtor i Arsimit, ka thënë se Gjilani ka arritur të dalë komuna e parë në nivel të vendit në testin për klasat e nënta dhe ky është një sukses i punës së mirë që kanë bërë nxënësit dhe mësimdhënësit e kësaj komune gjatë kësaj faze të shkollimit.

Në nivel komunal, rezultatet më të mira i ka arritur shkolla “Selami Hallaqi”, e cila pasohet nga “Abaz Ajeti”, ndërkaq suksesin më të dobët e ka pasur shkolla “Bajram Curri” e Shurdhanit.

Përndryshe, sa i përket regjistrimit në klasën e parë fillore, Musa ka thënë se do të vazhdojë të zbatohet formula e deritashme, ku merret parasysh rajonalizimi, numri i barabartë i nxënësve nëpër paralele, gjinia dhe përzgjedhja sipas alfabetit./rajonipress/