Të dielën, në Grykën e Karadakut – Trekëndëshi poetik i paqes tubon poetët e rajonit

Gjilan – Këtë të diele, për të pestën herë radhazi, Manifestimi tashmë tradicional, “Trekëndëshi poetik i paqes”, tubon poetët e rajonit, nga trekëndëshi kufitar Gjilan – Preshevë – Kumanovë si dhe nga shtetet e kësaj pjese të Ballkanit ( Shqipëria, Maqedonia, Kosova Lindore (Serbia) si dhe Kosova.

Organizator dhe nikoqir i këtyre takimeve, që kësaj here shënojnë dhe një jubile të vogël, është Ars Clubi “Beqir Musliu”, një asociacion alternativ i shkrimtarëve të Kosovës me seli në Gjilan, i mbështetur edhe nga MKRS -ja, përkatësisht Departamenti i Kulturës si dhe Komuna e Gjilanit thotë Sabit Rrustemi.

Simbolikisht, ky Manifestimi i cili i përkushtohet lirisë së Kosovës dhe ditës së çlirimit të Gjilanit, nis në pikëkalimin kufitar me Maqedoninë, në fshatin Stançiq, ku lexojnë tre poetë dhe, më pas bartet në ambientet e restaurant “Dunavi”, në Dunav, buzë një trekëndëshi të natyrshëm të Grykës së bukur të Karadakut.

Për dallim nga vitet tjera, nga ky vit e tutje, çdo “Trekëndësh poetik”, do ta ketë dhe nga një temë bosht apo emër shkrimtari, të cilin do ta trajtojë gjatë Manifestimit.

Kësaj here e nis me poezinë e Ibrahim Kadriut, në kuadër të 70 vjetorit të lindjes së tij dhe 50 vjetorit të Krijimtarisë letrare e publicistike.

Do të referojnë për poezinë e tij, Mahmut Hysa dhe kritiku letrar e poeti Ramadan Musliu, ndërsa poezi do deklamojë Adem Ajvazi.

Më pastaj, do mbahet dhe Ora letrare e poetëve e njohur si “Koha e Poezisë.

Parësore e këtij Manifestimi është afria mes poetëve të rajonit, përkatësisht të trekëndëshit kufitar, njohja dhe thellimi i miqësive si dhe përcjellja e mesazheve për paqe e harmoni mes popujve, përmes vargjeve./rajonipress/