Rikujtim: Fshati im në TV

E Diele – Njëzet Prill, tetëdhjetë e gjashtë; TV- Prishtina
Në fshatin tim bënë reportazh.

Kamera
Ngjitet përpjetë mbi male ,
Kalon mbi shpate –
Pushon mbi një kodër …

Fjala e gazetarit gërshetohet
Me film në një kuadër .
Sytë e mi para ekranit –
Bëhen katër !

Kuadri i parë :
Një rrugë e gjatë ,
E mundimshme , gjarpërore ,
Me kthesa të shumta –
Mbi brigjet kodrinore .

Një grup gazetarësh –
Mysafirë janë nisë …
Ajo i shpie thellë –
Mu n’ zemër t’ Malësisë .
Si nuse e stolisur
Dukej kjo Malësi ,
Bukuri e rrallë
Plot me begati !…

Sa e këndshme dukej
N’ ekran kjo natyrë
Dhe fshatarët e mi
Shikohen në “pasqyrë”!
Tok nëpër këtë rrugë –
Shtegtojnë kujtimet e mia ,

Deri në vendlindjen e shtrenjtë
Ku më mbeti fëmijëria !…
Kuadri i dytë :
Dhe hop !

Kamera mu në majë të fshatit tonë :
-Mu në oborr të shkollës , ku kënga jehon ,
-Mu në bibliotekë , ku nxënësi lexon ,
-Mu në ambulancë , ku mjeku shëron ,
-Mu para shitores , ku shitësi tregton …
-Mu në zyrë të vendit , ku lindjet shënojnë ,
-Mu n’ ara të fshatit , ku bujqit lëvrojnë ,
-Mu në kope delesh , ku qengjat blegërojnë ,
-Mu në faqe mali , ku shtëpitë shtat lëshojnë …
-Mu në brigje shkëmbi – shtyllat elektrike ,
-Mu në ballë të odës – një “kuti magjike”,
-Mu në oda burrash , ku shtrohet mikpritje ,
-Mu në ballë t’ oxhakut – një zemër fisnike !…

Dhe syri i kamerës
Prapë përmbi kodrinë –
Atje ku mësuesit
Mbjellin diturinë !…
Me këngët e shkronjave –
Fëmijët rriten n’ këto male …
Me krahë të shqiponjave
Dhe me abetare .
Dashuri në zemër –
Dituri gjithë fare .
Atje ku rinia –
Lëvrojnë diturinë ,
Si lastarët rritën –
Këndojnë lumturinë …
Kuadri i tretë :

Dhe ja –
Para kamerës sot :
Bujq , punëtorë ,
Barinj e blegtorë ,
Arsimtarë e shkollarë ,
Agronomë e mantelbardhë ,
Pilotë e ushtarë …
Të gjithë si në një fole –
Janë mbledhur tok .

Mbi faqet e mia –
U rrokullisën ca riga lot !…
Lotët u rrokullisën –
Nga vala e mallëngjimit ,
Nuk janë lot të dhembjes ,
Por janë lot të gëzimit ,
Prej kënaqësisë që ndjeva –
N’ këtë rrugë t’ përparimit !

Kuadri i katërt :
Syri i kamerës
U fut ndër zabele –
Një bari me fyell
Dhe një tufë me dele .
E shikoj me ëndje
Grigjën , atë bari –
Ashtu si dikur ,
Unë , kur isha fëmijë !…

Kuadri i pestë :
Kamera pa u lodhur
Mbi male trupon ,
Çdo gjë më të bukur
Syri i sajë xhiron .
Dhe ja bacë Bajramin *1)
Me një plis dhe shall –
Fare “pa koncept” ,
Ai i flet ca fjalë …
Me jone burrërie ,
Që shkrepin si strall –
Syri vërr s’i bënte ,
Këtij burri të rrallë !
Fliste për t’ kaluarën –
Sa shumë janë munduar !…
Për luftërat me jetën –
Që kanë përjetuar !…
-Por, qe sot kuadro ,
Kem prej çdo strukture

Dhe shumë shpejt e reja –
Do t’ shkelë mbi t’ kaluarën !
Fjalët e këtij plaku ,
Që s’i trembej syri –
Me mjeshtri i plotësonte
I riu – Zijadini !…*2)
Duke fol për planet
Të një transformimi –
Për fshatrat dhe malet ,
Që i pret lulëzimi !…
Ai fliste me gjuhën
E zemrës së popullit ,
Që ta shohin dritën –
Banorët e këtij truallit !
Për ambiciet , aspiratat ,
E të riut dhe plakut ,
Me gjuhën që flasin
Burrat e Gollakut .
Në oborr të shkollës –
I bien ziles Selmani !*3)
Para mikrofonit –
Veteran Limani .*4)
Nxënësit porsi bleta –
Rreshtohen n’ oborr ;
Shikoj mësues Latifin *5)
Me ditar në dorë !
Përballë shkollës s’ vjetër –
Një godinë e re ,
Lëshon shtat mbi male ,
Shkrepë dritë e hare !
Flet me admirim
Drejtor Milazimi : *6)
“Me hapa gjigant

Po shkojmë kah arsimi !”
Të shëndoshë si molla ,
Ngarendin fëmijët ,
Shikojnë kah kamera –
Nuk ia heqin sytë !
Në kokat e tyre ,
Ëndrra lindë përherë –
T’ bëhen kameramanë ,
Gazetarë, spikerë !…
Të bëhen teknikë ,
Minatorë, shoferë ,
Të bëhen pilotë ,
Doktorë , inxhinierë !…
Ëndërrimet e tyre –
Synim kah dituria ,
Që në një të ardhme –
Të shkrepë dritë Malësia !
Dhe prapë një grusht lotësh

Mbi faqe rrokullisa –
Kur i pashë rrugicat ,
Hapat ku i nisa !
Aty ku fillova
Të luaj e këndoj ,
Aty ku fillova
Të shkruaj e lexoj !
Aty ku u rrita –
N’ atë kasolle me kashtë …
Ku prindërit , mësuesi –
Gjithmonë më kanë dashtë !
Më njëzet të Prillit ,
Në tetëdhjetë e gjashtë –
TV – reporteri
Bënte reportazh !

*****Këtë poemë , në shenjë kujtimi ia kushtova fshatit tim të vendlindjes , me rastin e shikimit të një reportazhi në Televizionin e Prishtinës (TVP), të përgatitur nga gazetari Bajram Smakaj , për emisionin “Bujku”, të emetuar në TVP , më datën 20 Prill 1986 v. Ishte hera e parë në histori , që shikova nëpërmes ekranit televiziv një reportazh aq të bukur kushtuar fshatit tim.

Sqarimi i emrave të shënuar me fusnota :
*1) Bajram Ymer Pireva , shitës në shitoren e fshatit Tugjec – Malësia e Gollakut të Kamenicës .
*2) Zijadin Selim Krasniqi , ofiqarë i Zyrës së Vendit në Bashkësinë Lokale të fshatit Tugjec – Malësia e Gollakut të Kamenicës .
*3) Selman Kadri Kosumi , punëtor ndihmës i Shkollës Fillore “Nuhi Berisha” në fshatin Tugjec – Malësia e Gollakut të Kamenicës .
*4 ) Liman Ibish Doda , nga fshati Sfircë , mësues veteran në Shkollën Fillore “Nuhi Berisha” në fshatin Tugjec – Malësia e Gollakut të Kamenicës .
*5) Latif Mehmet Krasniqi , mësues në Shkollën Fillore “Nuhi Berisha” në fshatin Tugjec – Malësia e Gollakut të Kamenicës .
* 6) Milazim Qamil Matoshi , nga fshati Gëmicë , Drejtor i Shkollës Fillore “Nuhi Berisha” në fshatin Tugjec – Malësia e Gollakut të Kamenicës .
Demir KRASNIQI : “FRYMËMARRJE NËPËR STINË” – Istog , 1986, faqe 899.