Hoxhaj: Pa ushtri, të vështira marrëdhëniet kontraktuale me NATO-në

Kryetari i Komisionit për Punë të Jashtme, Enver Hoxhaj ka folur për sfidat e sigurisë të Kosovës e veçmas procesin e anëtarësimit në NATO si reflektime të analizës së sapo publikuar të Qendrës Kosovare për Studime të Sigurisë (QKSS).

Në këtë tryezë, Hoxhaj ka thënë se Forcat e Armatosura të Kosovës duhet të themelohen sa më shpejt që është e mundur.

“Themelimi i FAK-ut duhet të ndodhë sa më të shpejt. Jo më larg se gjysma e dytë e këtij viti. Pa ushtri, është shumë e vështirë për të nisur një proces normal të marrëdhënieve kontaktuare me NATO-në. Derisa të lëvizim në intensifikimin e bashkëpunimit duke hapur zyra ndërlidhëse politike respektive ndërmjet Kosovës dhe NATO-së, Kosova duhet të anëtarësohet edhe në disa organizata të tjera të sigurisë sikurse Adriatic Charter (A-5)” ka thënë Hoxhaj.

Ai më tej ka shtuar se “NATO ka përdorur dy qasje karshi nesh, në aspektin politik ka ndjekur qasjen e statusit neutral ndaj Kosovës ndërsa në atë ushtarak e ka ndihmuar shumë gjatë gjithë këtyre viteve”.

Sipas tij, edhe katër vendet anëtare të NATO-së që nuk e kanë njohur Kosovën duhet të shfaqin përkrahjen e tyre edhe për ambiciet e sigurisë të Kosovës sikurse e kanë bërë deri më tani në agjendën evropiane.