Besart Berisha mbret, gol dhe titull për Melbournen

Është njeri i finaleve, është njeri që nuk humb rastet që i jepen për të shënuar, është njeriu më i urryer për portierët kundërshtarë pasi gjithmonë i gjunjëzon ata.

Fjala është për sulmuesin më të mirë shqiptarë në dekadën e fundit, Besart Berishën, i cili ka arritur edhe një titull të kampionit në Australi, ku kësaj radhe feston me Melbournen.

Ylli kosovar, ka shënuar gol në finalen mes skuadrës së tij Melbourne Victory dhe Sydneyt, që përfundoi me rezultat 3-0, transmeton Telegrafi/

Prishtinasi e hapi serinë e golave në minutën e 33-të, të ndeshjes, ku pasi u asistua nga Guillerme, tregoi edhe njëherë se është ‘vrasës’ për portierët kundërshtarë duke shënuar për 1-0, dhe duke sjellë gëzim të madh te tifozët.

Deri në fund të ndeshjes, Melbourne shënoi edhe dy gola të tjerë, nëpërmjet Barbarouses dhe Brexhamit.

Ky ishte titulli i tretë në karrierë për Berishën në kampionatin australian, pasi dy herë më parë u shpall me ish-skuadrën e tij, Brisbane Roar.