Në Gjilan pritet të nis së shpejti ndërtimi i kampusit universitar

Gjilan – Kryetari i Komunës së Gjilanit, Lutfi Haziri ka pritur sot në takim u.d. rektorin e Universitetit Publik Gjilanit “Kadri Zeka”, Naim Syla.

Kryetari Haziri dhe u.d. rektori Syla kanë diskutuar për bashkëpunimin, koordinimin dhe rolin e Komunës së Gjilanit në përmirësimin e infrastrukturës në përgjithësi, drejtimet dhe kushtet e studimeve.

Poashtu, në këtë takim kryesisht është folur për kampusin universitar, i cili do të nis së ndërtuari së shpejti, në vendin ku aktualisht është FSK-ja.

Kryetari Haziri tha se kampusi universitar do të realizohet në bashkëpunim me rektoratin dhe me qeverinë, i cili do të ofrojë mundësi shumë më të mira për studime sa më cilësore me kushte shumë më të favorshme për studentët.

U.D. rektori i Universitetit Publik Gjilanit “Kadri Zeka”, Naim Syla, ka falënderuar kryetarin Haziri për mbështetjen e dhënë si dhe për angazhimin e tij të jashtëzakonshëm që të kemi një universitet cilësor në Gjilan./rajonipress/