Heqja e vizave, sa më shpejt

Ministri i Punëve të Jashtme i Letonisë, Edgars Rinkevics, ka thënë se ky vit do të jetë i rëndësishëm për nënshkrimin e Marrëveshjes së Stabilizim-Asociimit (MSA) ndërmjet Kosovës dhe Bashkimit Evropian (BE), si dhe për heqjen e vizave për qytetarët e Kosovës. Këto deklarata ai i ka bërë të enjten gjatë takimeve me liderët institucionalë në Kosovë, me ç’rast ka thënë se nënshkrimi i MSA-së dhe liberalizimi i vizave për kosovarët, do ta vendosë Kosovën në rrugën e pakthim drejt Bashkimit Evropian.

Presidentja, Atifete Jahjaga, nëpërmjet një komunikate për shtyp, ka njoftuar se me ministrin letonez ka biseduar për zhvillimet e përgjithshme në Kosovë, si dhe për bashkëpunimin bilateral midis dy vendeve, ku ka theksuar rëndësinë e thellimit të bashkëpunimit dhe të mbështetjes për Kosovën sidomos në proceset e integrimit në strukturat veri-atlantike.

“Me ministrin Rinkevics biseduam për zhvillimet e përgjithshme në Kosovë, si dhe për bashkëpunimin bilateral midis dy vendeve. Republika e Letonisë mbështet fuqishëm integrimin e Kosovës në Bashkimin Evropian”, thuhet në njoftimin e presidentes Jahjaga.

Për bashkëpunimin ndërmjet Kosovës dhe Letonisë është diskutuar edhe në takimin që ministri Rinkevics ka pasur me kryeministrin e Kosovës, Isa Mustafa.

“Kryeministri Isa Mustafa theksoi angazhimin e posaçëm të Qeverisë së Kosovës në proceset integruese evropiane, duke shprehur nevojën e nënshkrimit sa më shpejt të Marrëveshjes së Stabilizim-Asociimit dhe liberalizimin e vizave për kosovarët”, thuhet ndër të tjera në njoftimin e Zyrës së Kryeministrit.

Ndërsa, shefi i diplomacisë letoneze, Edgars Rinkevics, pas takimit që ka pasur me ministrin e Integrimeve Evropiane, Bekim Çollaku, tha se mezi pret që të shohë finalizimin e procesit të MSA-së.

“Shpresoj se procesi i nënshkrimit të MSA-së, të ndodhë gjatë kohës sa Letonia është në krye të Bashkimit Evropian, pasi që ne do të punojmë shumë që një gjë e tillë të ndodhë. Mezi po pres të shoh raportin e Qeverisë së Kosovës për të parë se a janë zbatuar kriteret e vëna nga BE-ja për të përfunduar këtë proces sa më shpejt”, ka deklaruar Rinkevics.

Ndërsa, duke folur për heqjen e vizave për kosovarët, Rinkevics ka thënë se Letonia do ta mbështesë Kosovën në këtë proces dhe se shpreson që nuk do të ketë vonesa edhe më tutje.

Ndërsa, ministri i Integrimeve Evropiane të Kosovës, Bekim Çollaku, ka thënë se Kosova ndodhet para dy proceseve të rëndësishme në rrugën e integrimeve evropiane, e që janë nënshkrimi i MSA-së dhe liberalizimi i vizave.

“Jemi në prag të dy momenteve kyçe të cilat do ta çimentojnë rrugën e Kosovës drejt BE-së. Procesi i parë ndërlidhet me nënshkrimin e Marrëveshjes së Stabilizim-Asocimit, që ne presim të ndodhë sa më shpejt, e ne dëshirojmë të ndodhë gjatë presidencës së Letonisë në krye të BE-së, që i bie deri në qershor, apo korrik”, ka thënë Çollaku, duke shtuar se proces tjetër i rëndësishëm është edhe heqja e vizave për qytetarët e Kosovës./zeri/