Qeveria shpërfill ultimatumin e opozitës

Partitë opozitare kërcënojnë se do të dalin sërish në shesh në rast se Qeveria e Kosovës brenda dy javësh nuk i përgjigjet pozitivisht ultimatumit të dhënë ditë më parë.

Pavarësisht kësaj, Qeveria e Kosovës, e cila deri në fund të javës së ardhshme do të duhej t’i përgjigjet ultimatumit, as që ka filluar t’i trajtojë kërkesat e opozitës, ku është kërkuar ulja e çmimit të energjisë elektrike, largimi i ministrit të Drejtësisë, Hajredin Kuçi, dorëheqja e kryetarit të Kushtetueses, Enver Hasanit, moskrijimi i Asociacionit të Komunave me shumicë serbe, sikurse “Trepça” të shpallet me ligj ndërmarrje publike me status të veçantë.

Tri partitë politike opozitare, Lëvizja “Vetëvendosje”, Aleanca për Ardhmërinë e Kosovës dhe “Nisma për Kosovën” janë në pritje të realizimit të kërkesave, në të kundërtën kanë paralajmëruar se nuk do të ndalen me organizimin e protestave.

Ish-kryetari i Kuvendit, Jakup Krasniqi, ka deklaruar për gazetën “Zëri” se është më se e domosdoshme që Qeveria të reflektojnë karshi kërkesave të qëndrueshme të protestuesve.