Luani: Haxhi Krasniqi do të bëhet kampion bote

Në mesin e sportistëve të ftuar në drekën e organizuar nga Komitetit Olimpik i Kosovës, për të nderuar presidentin Thomas Bach, ishte edhe boksieri i famshëm kosovar, Luan Krasniqi.

Ish-kampioni i Evropës në boksin profesionist dhe mëtuesi për titull bote në vitin 2005, ka shfrytëzuar qëndrimin e tij në Kosovë, për t’u bashkuar me sportistët e tjerë të Kosovës dhe me mikun e tij, Thomas Bach, i cili tashmë është president i Komitetit Olimpik Ndërkombëtar.

Në një bisedë për Sportin Total, Krasniqi ka folur për miqësinë e tij me Bachun, por edhe për sportistët kosovarë, kushëririn e tij, Haxhi Krasniqin dhe aktivitetet e tij pas përfundimit të karrierës si boksier profesionist.

“Në përgjithësi për Kosovën, kjo vizitë ka rëndësi shumë të madhe. Me Bachun njihem moti dhe u gëzova shumë që e pashë”, ka thënë në fillim Krasniqi.

Ai ka vlerësuar lart sportistët kosovarë dhe sukseset e tyre në arenën ndërkombëtare, në vitet e fundit.

“Ne shqiptarët jemi shumë të suksesshëm jashtë Kosovës. Shkodran Mustafi dhe Xherdan Shaqiri, ai tjetri e tjetri, kemi pasqyrë shumë të mirë. Këta janë pasqyrë e këtij vendi. Besoj se kjo vizitë e Thomas Bachut ka të bëjë me këta njerëz”, ka thënë Krasniqi.

Luani, i cili bëri të gjithë shqiptarët për veti që nga pjesëmarrja e tij në Lojërat Olimpike e deri në vitet e fundit të karrierës, si boksier profesionist ka thënë fjalë të mira edhe për Haxhi Krasniqin, mëtuesin tjetër për titull bote në boks.

“Kushëriri im, Haxhi Krasniqi, patjetër se është fytyrë e rëndësishme. Ai synon dhe besoj se shpejt do të bëhet kampion bote”, ka pohuar Luani për Sportin Total.

Por çfarë është duke bërë ai tani, pas përfundimit të karrierës në boksin profesionist: “Luani merret me aktivitete humanitare. Kam obligime tjera. Nuk pushoj. Kam rrugëtim tjetër që mosha dhe të gjitha të shkojnë në drejtimin që duhet”.

Luan Krasniqi u prezantua në ringun e boksit amator në vitin 1995, ndërsa një vit më pas ai mori pjesë në Olimpiadën e Atlantas, duke e fituar medaljen e bronztë olimpike.

Krasniqi vazhdoi karrierën në boksin profesionist nga viti 1997 e deri më 2008, duke zhvilluar 35 meçe, prej tyre 30 fitore, 14 me nokaut dhe 4 disfata, dy prej tyre në meçet e fundit. /Telegrafi/