Shkatërrohet rrjeti shqiptar i kokainës në Itali

Një organizatë e gjerë kriminale e përbërë tërësisht nga shtetas shqiptarë, aktive në shpërndarjen e kokainës në të gjithë Italinë, është shkatërruar nga karabinierët e qytetit të Udineses.

Lajmin e bëjnë të ditur agjencitë lokale të shtypit, sipas të cilave operacioni i njësisë hetimore të karabinierëve është koordinuar nga Drejtoria Rajonale e Antimafias.

Gjithsejtë janë kryer 5 arrestime dhe 17 kontrolle banesash në bazë të urdhër-arresteve të lëshuara nga Prokuroria e Venecias ndaj anëtarëve të organizatës, transmeton tch.

Sipas hetuesve, droga importohej nga Holanda, kalohej me tren nga Franca në Itali dhe më pas shpërndahej në territorin e vendit fqinj, si dhe në Shqipëri e Maqedoni.

Autoritetet kanë vlerësuar se aktiviteti ndër vite i kishte siguruar grupit kriminal rreth 10 milionë euro të ardhura.