Haxhi Krasniqi pret mbështetje nga shqiptarët

Haxhi Krasniqi pret që në meçin ndaj Jurgen Brahmer, i vlefshëm për titullin e kampionit të botës në versionin WBA, të ketë mbështetje nga tifozët shqiptarë, të cilët nuk e lënë anash kurrë.

“Rostocku është shtëpi e Brahmer, por, për mua më e rëndësishme është Gjermania, tifozët nga Bavaria, nga Kosova dhe nga e gjithë Evropa, që i kanë rezervuar biletat. Unë jam i gatshëm, është një sfidë e vështirë, pasi do ta kem përballë një kampion bote. Ka pak njerëz që janë të aftë të ecin mbi flakë. Ai jam unë. Në një formë të tillë, fizikisht dhe mentalisht, s’kam qenë kurrë”, ka thënë boksieri kosovar në një intervistë për “ovb-online.de”, përcjell Zëri.

Ai e kujton edhe të kaluarën, se sa ishte munduar për të ardhur deri tek kjo ditë. “E kam nisur nga asgjë, karrierën amatore, pa promotor, siç e kam tash Ulf Steinforthin. Në vitet e para të karrierës, shtrihesha në krevat, i dërrmuar dhe pyesja nëse kjo që jam duke e bërë ka sens. E kam dashur vetëm këtë sport, duke hequr dorë nga gjithçka. Pa rrezikuar, nuk do të bëja asgjë. 21 marsi është dita ime, do të jem njeriu më i lumtur në botë, dua që jeta ime të ndryshojë komplet. Por, në karakter dhe ambient, do të mbetesha i njëjti”, vazhdoi Krasniqi. /Zëri/