Ndikimi i Sami Lushtakut, vendimtar në tenderin 6-milionësh

Dy takime të Sami Lushtakut me zyrtarët e KEK-ut ishin përcaktues se në llogarinë e kujt do të shkonin mbi gjashtë milionë euro nga një tender. Atë do ta fitonte djali i vëllait të tij, Milazim Lushtaku, ani se kompania e tij, pos që ishte më e shtrenjtë, nuk i plotësonte kushtet ligjore.

Këto kritere as që bëhej fjalë të ishin pengesë për t’u shpallur fitues kompania “Security Code” që kishte konkurruar së bashku me kompaninë WDG, pronë e kryetarit të Obiliqit, Xhafer Gashi shkruan sot Koha Ditore.

Konsorciumi i tyre nuk i kishte licencat e nevojshme të sigurisë, ishte më e shtrenjtë dhe nuk kishte punëtorë të specializuar. Mirëpo të gjitha këto ishin “rregulluar” falë fuqisë së Lushtakëve.

Bashkëpronari i Milazim Lushtakut, Esat Tahiri, ishte kujdesur që të ofronte dokumente fals si “dëshmi” se kishte licenca dhe punëtorë të kualifikuar.