Shpëtimtarët e Erionit po përballën me akuza e kërcënime

Dy personat kryesorë që kontribuuan në kthimin e Erion Zenës (8) nga Siria nuk i kanë punët mirë. Për njërin prej tyre të hënën është ngritur aktakuzë për vepra të rënda penale përderisa tjetri është detyruar të largohet nga shteti “si pasojë e kërcënimeve”.

Ndaj Fitim Lladrovcit, i dyshuar për pjesëmarrje në organizatat terroriste “ISIS” dhe “Al- Nusra”, që kishte bashkëpunuar me autoritetet kosovare, duke mundësuar kthimin e Erionit nga Siria, Prokuroria Speciale e Kosovës ka ngritur aktakuzë për veprat penale:

“Organizimi ose pjesëmarrja në grup terrorist” dhe “Mbajtja në pronësi, kontroll ose posedim të paautorizuar të armëve”. Kurse Suad S., kushëriri i nënës së Erionit, Pranvera Abazi, thuhet të ketë emigruar nga Kosova për shkak të kërcënimeve që ka pranuar lidhur me kontributin që dha në kthimin e 8-vjeçarit në Prishtinë, shkruan Koha Ditore.

Për ngritje të aktakuzës ka njoftuar Prokuroria Speciale përmes një njoftimi, në të cilin thuhet se i pandehuri Fitim Lladrovci me pseudonimin “Fita”, më datën 8 dhjetor 2013, ka udhëtuar nga aeroporti ndërkombëtar i Prishtinës “Adem Jashari” për në Stamboll, prej nga me automjete të ndryshme ka shkuar në një qytet afër Aleppos, në Republikën Arabe të Sirisë…

“Suadi ka qenë i kërcënuar vazhdimisht për shkak se ka ndihmuar kthimin e Erionit. Ai ka ikur nga Kosova së bashku me familjen për këtë arsye”, i ka thënë një burim gazetës.

Se kush e ka kërcënuar Suad S., autoritet kosovare nuk kanë dashur të japin informata me arsyetimin se behët fjalë për “të dhëna konfideniale”.