Selimi: Qeveria nuk do të përfshihet në kthimin e migruesve ilegal

Zëvendësministri i Punëve të Jashtme, Petrit Selimi ka mohuar që Qeveria e Kosovës të jetë përfshirë në kthimin masiv të kosovarëve nga vendet e BE-së. “Çështja e azil kërkuesve zgjidhet nga shtetet vet dhe Ambasada e Republikës së Kosovës në Berlin as që ka qenë përfshirë, por as nuk do të jetë e përfshirë, as nuk mund të jetë e përfshirë në çfarë do kontraktimi apo në çfarë do financimi të kthimit”, ka thënë ai për Radio Kosovën.

Çështja e azilit, sipas tij, është çështje e brendshme e shtetit përkatës, prandaj institucionet e Kosovës nuk kanë asnjë angazhim në këtë drejtim.

“Natyrisht që ne e dimë që Azili për arsye ekonomike nuk pranohet dhe Gjermania disa herë ju ka thënë shqiptarëve të Kosovës se nuk do tju japin azil, pos a i përket kthimit kjo është çështje e brendshme e Gjermanisë e rregulluar nga vetë Gjermania dhe Ministria e Punëve të Jashtme të Kosovës nuk ka kurrfarë angazhimi, sepse legalisht nuk mund të ketë kurrfarë angazhimi në këtë çështje”, ka shtuar ai.