Thaçi “mbikëqyret” nga Haradinaj

Kryetari i Aleancës për Ardhmërinë e Kosovës, Ramush Haradinaj nuk e ka ndjekur shembullin e liderit të Vetëvendosjes, Albin Kurti, për të qëndruar jashtë komisioneve parlamentare.

Përkundrazi ai është përcaktuar që të jetë pjesë e Komisionit për Punë të Jashtme, i cili në kuadër të fushëveprimit të tij e ka mbikëqyrjen e politikës që udhëhiqet nga Ministria e Punëve të Jashtme, në krye të së cilës tash është Hashim Thaçi.

Kur është bërë ndarja e Komisioneve, siç ka mësuar Gazeta Tribuna, PDK-ja ka insistuar ta marr drejtimin e këtij Komisioni dhe në krye të tij ta vë ish-ministrin e Jashtëm, Enver Hoxhaj.

Ky i fundit, gjatë raportimeve të mëhershme në Kuvend, nuk është ndarë lehtë nga Albin Kurti, i cili asokohe ka udhëhequr Komisionin për Punë të Jashtme.